E persona seriamente herida na e embahada Hulandes na Beirut den un explosion masivo diamars, ta esposa di embahador Hulandes na Libanon, segun ministerio di Asuntonan Stranhero a confirma. E ta traha na e embahada tambe. Rey Willem-Alexander y reina Maxima a duna un declaracion expresando nan condolencia na tur esnan afecta.
Un total di seis persona a resulta herida na e embahada, segun NOS. Ademas di e seriamente herida, cinco otro persona a sufri heridanan menor.
“Beirut ta den shoc despues di un desaster di proporcionnan sin precedente. Cu pueblo Libanes asina afecta, nos pensamentonan ta cu tur esnan cu ta den duelo y tin miedo”, e pareha real Hulandes a bisa den e declaracion. “Nos kier expresa nos pesame sincero na esnan cu a perde sernan keri, y nos ta desea tur e lesionadonan forsa y un recuperacion lo mas pronto posibel. Comunidad internacional ta para cu boso.”
Minister Sifrid Kaag di Cooperacion Comercial y Desaroyo Stranhero a bisa cu Hulanda ta cla pa duna asistencia na Libanon cu buskeda y rescate, y pa duna sosten inmediato na Cruz Cora Libanes.
Sikiera 100 persona a perde nan bida y 4 mil persona a resulta herida den e explosion, cual ta kere a ser causa pa ammonium nitrato warda den un bodega. “E explosion a destrui decenas di miles di cas, lagando hasta 250mil persona sin hogar, gobernador di Beirut a bisa MTV Lebanon. El a calcula e daño na mas di 2.5 biyon euro.
