Minister Glenbert Croes ta reacciona: “Ami no ta notula loke cada ken a bisa”

Minister Glenbert Croes a reacciona riba algun ponencia cu e por a tende cu parlamentario Ricardo Croes (RED), a haci den su direccion relaciona cu situacion di su colega Marisol Lopez-Tromp.

E no tin di haci cu e debate mes den Parlamento diabierna ultimo pa atende cu un mocion di desconfiansa contra Lopez-Tromp. Pero mas tanto riba minister Glenbert Croes su participacion den e comision di mediacion presidi pa abogado Arie Swaen. “Mi kier set the record straight si,” e mandatario a bisa.

E mandatario a declara cu na dado momento parlamentario Ricardo Croes a menciona su nomber pa loke ta trata e proceso di e comision di mediacion. E mandatario mes no tabata cla riba si el a contribui pa cambia palabra. “Algo asina ma compronde,” el a expresa.

Aunke durante e transmision di e conferencia di prensa di gobierno, e mandatario a laga sa cu e kier bisa esaki off the record. Esta cu el a participa den e comision di mediacion den nomber di e lider di nan partido, pero tambe den nomber di nan partido MEP.

El a referi cu e mes ta considera cu e comision ta conforma pa hendenan serio y presidi pa Mr. Swaen. E tin di haci cu loke minister Glenbert Croes a yega di expresa den nomber di esunnan cu el a bay representa. Minister Croes ta afirma cu loke el a bisa, nan a notul’e y registr’e. Ademas e ta haya loke el a bisa nan a registra ‘corectamente’.

Pero e ta haya cu loke e lidernan di otro partido cu a participa na e comision, con nan palabra a wordo registra, ta keda pa nan mes atende cu e comision ‘no cu mi’. Asina e mandatario a declara sin bay den detaye riba locual e mes, ni e otronan, a bisa na e comision di mediacion. “Ami no ta notula loke cada ken a bisa,” el a bisa.

El a reitera cu e comision a registra corectamente su palabranan, cu el a bisa. Pero tambe cu e no tabatin ni arte ni parti con palabranan di otro coleganan a wordo registra y notula. Parlamentario Ricardo Croes a yega di referi cu e notulanan y documentonan di e diferente reunion cu nan a yega di participa pa atende e impasse cu a surgi cu Sra. Lopez-Tromp, den ningun di e documentonan aki ta refleha e pensamento di RED. Esta cu e partido y su minister no tin problema cu e mandatario aki.