Despues cu FASE a wordo introduci na luna di april pa brinda un ayudo financiero na e trahadonan cu a keda sin trabao y sin salario, e Fondo di Asistencia Social di Emergencia aki a cuminsa drenta den su fase final te fin di september.

E tabata un plan di ayudo temporal, inicialmente di tres luna te juni. Pero mirando e golpi fulminante cu Covid a dal nos principal pilar economico, a dicidi di ampli’e pa tres luna mas te final di september.

Kico despues di FASE?

Pero, con lo para cu e cantidad di hende cu ta ricibi e ayudo vital aki, despues cu FASE lo yega su final? Segun cifra cu minister Glenbert Croes a trece dilanti di Directie Financien, un cantidad di 10.499 persona a haya FASE pa un total di 9’958.636 florin.

E cantidad a baha gradualmente pa un total di 4.185 persona cu a haya FASE pa luna di juli. Sin pretende di ta pesimista, pero tur cos ta mustra cu e cantidad di persona cu lo mester di e tipo di ayudo aki por aumenta.

Segun e mandatario no tin un conexion entre reactivacion gradual di nos economia cu e proyecto di FASE. Pero si esun cu ta bay bati porta di FASE ta personanan desemplea. No a falta e expresion di e mandatario: “Ohala cu nos por tin un FASE eterno. Pero realidad ta diferente.”

E ta un ayudo totalmente otro cu subsidio di salario cu ta percura pa sigura cupo di trabao pa negoshinan cu ta luchando pa sobrevivi. E concepto di FASE ta pa e personanan cu a keda sin trabao y no tin entrada, pasobra nan fuente di trabou no t’ey mas.
Ki sorto di ayudo lo mitiga nan situacion economico? E situacion aki ta depende di diferente factor, entre nan, capacidad financiero di nos pais, Hulanda su ayudo financiero y recuperacion economico di nos pais.

Di un banda minister di Asunto Social y Labor, Glenbert Croes, ta haya responsabel cu despues di seis luna e plan temporal di ayudo social aki por haya su final. Pa asina habri e porta pa otro plan di ayudo mas structura. For di april te juli, kiermen den un periodo di cuater luna, 10.780 persona a haya pago di FASE pa un suma total di Afl. 24’051.302.

Pero loke e ta considera obvio ta, cu mester bin un maneho socioeconomico nobo cu lo tuma over e personanan cu FASE a atende cune. Pero e mester ta un maneho permanente y structural. Esey -segun e mandatario- lo ta e capitulo cu lo bin inmediatamente despues di FASE. Di e forma aki gobierno por evita pa niun hende no cay den un bashi socioeconomico. El a laga sa cu gobierno a cuminsa traha riba un plan B social.

Ley di FASE

Contestando pregunta di Bon Dia Aruba, e mandatario a declara cu prome cu nan ta yega na e plan aki, nan kier percura cu e tema di FASE wordo atendi. Tambe e proceso legislativo di FASE, ya cu e ayudo aki ta wordo brinda. aunke nan tin e presupuesto cu a wordo acorda pa FASE, pero mirando tur e proceso cu e tipo di plan di ayudo aki ta rekeri, mester un ley pa FASE mes.

Na e momento aki Centrale Accountants Dienst y Contraloria General ta haciendo investigacion riba maneho di FASE. El a recorda e hecho den pasado cu como politico, el a wordo teni responsabel pa yudansa di indexering 266 trahado, caminda e suma tabata rond di 600 mil florin. Mientras e biaha aki cu FASE e suma ta rond di 30 miyon florin. Segun e mandatario, FASE ta exigi di nan como gobernantenan pa maneha responsabel.

FASE a bin como un fondo di emergencia pa atende y preveni e problema social cu Covid a trece cune. E mandatario ta convenci cu e fondo di asistencia social di emergencia aki, tabata un di e instrumentonan cu a yuda pa gobierno por atende cu loke el a yama e ‘paz social.’

Smaak amarga

Sinembargo ainda FASE den su proceso final a laga atras un smaak amarga pa cantidad di hende cu a aplica p’e y cu te ainda no a haya niun ayudo.

Tin hendenan cu aplica despues di 13 di maart, ora cu e dos prome caso di Covid a bati nos porta, y cu no a haya nada di FASE. Eventualmente pa algun motibo, el a keda pega algun caminda. Minister Glenbert Croes ta consciente di e situacion aki y e ta spera cu no ta hopi hende afecta.

Tin un team cu ta revisando tur inscripcion di solicitud, pa esun cu no a haya por sigura cu nan por hay’e. El a bolbe haci un yamado pa esun cu a yega di haya FASE, pero tambe esunnan cu no a hay’e, y ainda nan no a haya trabao, pa solicita pe, prome cu dia 15 di augustus cu ta e deadline.