Despues di e teremoto cu ministro di infrastructura y medio ambiente a causa den sala di Parlamento diabierna pasa, a bin diasabra e rueda di prensa di su colega ministro di Husticia, cu a reacciona riba loke su colega ‘non grata’ a trece dilanti den e reunion di diabierna.

E rueda di prensa no tabata contene ningun tipo di fuego artificial manera diabierna y di ningun manera tabata convence. Naturalmente no a anticipa esey tampoco, pero si a spera cu lo a scucha un posicion mas fuerte, ya cu ta lider di partido tabata papia, pero nada. Por ehemplo, ora prensa a puntra kico ta su opinion tocante e observacion di su fraccion durante e reunion den Parlamento, unda a bisa repetidamente cu “si e ministro no bay cas, gobierno ta bay cas”. E contesta cu mester puntra esey na e miembro di fraccion ta muestra di e falta di fortaleza pa actua como berdadero lider ora mester. En todo caso, por a deduci cu e intento di mediacion cu lo mester bay tuma lugar via Promer Ministro, no ta bay ta facil, tambe pasobra e forma spectacular con e ministro ataca a defende su mes a pone na descubierto e cosnan malo cerca henter e partido, y hasta di e otronan tambe.

Pero tabatin otro cos interesante a tuma lugar. Miembronan di e propio fraccion a trece dilanti na final, cu nan no tabata na altura di tur e asuntonan cu e ministro a trece dilanti. Esey ta dificil pa kere, sigur den caso di e parlamentario cu a mira su señora perde un contrato bunita na Serlimar na man di e ministro. Y cu nan no ta na altura cu e ex-ministro tabata colga manera un sombra riba ‘su’ ministronan nan lo mester sa, pasobra den tur partido, e grandinan tambe, tin un partijraad cu ta pendiente na tur momento di kico un ministro ta haci. Y mishi cu interes di sponsor, o di beneficiado di partido cu a haya puesto den gobierno, ta un pica mortal cu ta keda comenta den tur circulo partidario.

Pero realmente loke nan tabata sa of no sa, no ta asina relevante. Loke ta mas interesante ta kico e coleganan di conseho di ministro tabata sa, tambe Promer Ministro mes. Pasobra loke nos por constata awor ta cu nan a scoge banda di e otro ministro di POR den e asunto aki, y ta bira importante kico nan tabata sa. Si nan no tabata sa nada, nan ta demasiado naief pa por sigui como politico. Y si nan tabata sa kico tabata tumando lugar, anto conscientemente nan a scoge banda di esun cu, segun nos opinion, ta completamente fout den e asunto aki. Nos por imagina nos cu nan tabata na altura y a scoge conscientemente pa apoya e ministro encarga cu husticia, y esey pa un motibo obvio: e ta para pa continuacion di eherce politica ‘old school’ manera den e otro partidonan tambe ta custumber y tradicion. Nan lo a scoge pa esun cu den nan vista tabata defende e cultura asina conoci den nos partidonan politico. Ta e ministro di Infrastructura a bin viola e ‘Omerta’ di bida politico na Aruba actuando di otro manera, pa e motibo cu el a splica den Parlamento diabierna pasa. El a kibra e entendimento entre politico cu no ta mishi cu e asuntonan unda e partido ta eherce influencia y poder a traves di duna y haya fabor, y esaki pa loke ta persona individual o empresa di hendenan liga na partido.

Ta dificil pa kere cu nan no tabata sa kico tabata tumando lugar den e partido, pasobra cerca nan cosnan ta bay mescos. Sin embargo, finalmente a resulta cu algo nan no tabata sa, y esey ta cu e ministro a scoge e rumbo cu el a scoge. Cu esey anto, tur cos a cambia? No, pasobra nos no ta ripara na nada ainda cu e actuacion di e ministro a pone su coleganan pensa un rato, pa basta rato mas bien. Y loke e ministro ataca a pone ‘clip and clear’ riba mesa ta esaki: di un gabinete cu a cuminza cu tanto ‘bombas y platillos’ cu palabranan pisa manera ‘integridad’ y ‘transparencia’, ta bay ehecuta esaki o tur cos lo keda na palabra y e gabinete ta dicidi toch di manda e ministro cas, y ta sigui nan bida di engaño politico, apoyando esnan cu ta pro pa continua cu e bida politico dañino y perverso, manera nos conoce pa mas di 6 decada caba. Esey lo tin un bentaha grandi pa nan, pasobra nan lo ta ‘libra’ di esun cu a resulta di ta un disonante den nan gabinete.

Sin embargo, si nan haci esey mes, y kier nombra un otro ministro, ta bin otro problema. Pakico nos ta kere cu e ministro a papia asina extenso tocante e proceso di screening den cual e mester a pasa? Esey tabata un proceso di Aruba? Despues di dos ministro cu lo bay cera pa delito cu tereno, el a haya e advertencia cu e por bira e di tres. Con e partido ta bay haya un candidato cu ta bay cumpli cu partido y ta logra pasa e screening…? Intervencion Hulandes ta tumando lugar caba…