Ayera tardi, minister di Desaroyo Teritorial y Infrastructura, Marisol Lopez-Tromp a yega back Aruba for di Hulanda. Na su yegada el a wordo ricibi pa un grupo di periodista pendiente pa conoce su impresionnan prome cu e reunion awe den Parlamento cu lo por mir’e perde su cartera.
“[Diaranson] anochi mi a ricibi e oproep via e-mail, y na e momento ey mi a cuminsa pensa kico mi ta bay haci”, el a declara.
Contestando pregunta di prensa tocante e hecho cu maske Parlamento tabata na altura di su biahe pa Hulanda di antemano, toch a pone den programa un reunion pa awe, el a declara: “Prome cu diasabra mi coleganan tabata sa caba, pasobra nos ta avisa ki dianan nos ta bay ta den exterior, kiermen no ta diasabra tabata e prome dia cu nan a haya sa esey. Diasabra mi a mencion’e berdad despues di e supuesto Geschillen Commissie, en berdad mi a bisa esey publicamente.”
Tocante si lo trata di un reunion ‘hamerstuk’, el a bisa: “Bon, un reunion publico normal, un minister tin su espacio no solamente pa contesta tur e preguntanan cu lo por tin, sino tambe pa splica riba su maneho cu e tin, naturalmente cu informacion al caso.” E ta haya cu no por hacie un caso hamerstuk sin debate, ya cu hamerstuk ta nifica sin argumenta, ni vota.
“Normalmente presidente di Parlamento lo duna espacio na e ministernan invita. Mi lo haci uso di e oportunidad aki, pues p’esey mi a bin Aruba.” El a bisa cu su coleganan tabata na haltura cu e lo biaha diadomingo, y e no tabata sa mes di e carta den cual lider di fraccion POR cu otro lidernan di coalicion, sino el a wak esaki te dia cu el a ricibi e oproep; pero e carta tabata firma for di diabierna. “Kiermen prome cu mi a bay e Geschillen Commissie, ya nan a tuma un decision.”
El a bisa cu e semper tabata prepara pa defende su posicion como minister, ‘ta e momento mi no a haya’. “Por bisa cu na momento cu mi a tende cu lo tin un Conseho di Minister pa discuti kita e cartera, esey mi no tabata invita na dje. Despues e Geschillen Commissie, cual tabata un reunion cortico. Ainda mi ta trahando riba mi relato completo di mi motibonan, por escrito, pa bay acopla na e rapport. Mi a bay exterior, pues mi no a tene rueda di prensa.”
El a expresa cu e lo warda pa mira kico lo trece dilanti den e reunion awe. El a bisa cu e sa cu su coleganan den coalicion, den e caso aki fraccion RED, el a bisa cu tanto minister Rudy Lampe y parlamentario Ricardo Croes a yega di expresa sosten na su situacion. Sinembargo, toch nan a firma e carta. Pues e lo ta curioso pa mira kico lo trece dilanti.
“Mi no a spera loke a pasa diabierna siman pasa. Ni maske lo por tin diferente pensamentonan pa cu temanan den e cartera cu te e momentonan aki oficialmente mi tin, segun landsbesluit y pa ley… esey no ta motibo pa retira un minister. Pasobra si no, ta hopi minister lo mester bay cas.”
Bon Dia Aruba a puntra, mirando e ‘master plan’ di gobierno den cual ta pone hopi enfasis riba sostenibilidad y ecologia, mientras un di e criticanan di su coleganan di POR (entre otro) ta su posicion pa cu piscamento cu harpun y e 16 tereno cu a pasa pa Fundacion Parke Nacional Aruba, con e por splica e posicion di gobierno? “Ta hopi straño pasobra tur di nan ta tema cu ta trata naturalesa y medio ambiente, pues primariamente bou di e ministro cu tin cu cuida y protege naturalesa y tratadonan internacional. Pa mi no ta algo personal, e ta mi tarea. Si no ta ami, ken anto? No ta asina cu tin algun intransigencia of algo asina. Mi no por firma documentonan cu ta carece di puntonan pa medio ambiente den dje. Na final, si lo tin un proceso den corte, ta e minister en cuestion lo mester bay. Kiermen mi ta firma un documento ora mi ta sigur cu e ta carga tur e contenido cu mi ta considera importante pa cumpli cu e funcion cu mi tin e responsabilidad.”
Contestando si el a haya algun reaccion di Hulanda, el a bisa cu si, cu tin varios a tuma contacto cune. El a bisa cu el a bin pakico ta kita confiansa for di dje. “Mi kier scucha di parlamentarionan, di boca di cada un, kico ta forma e base pa no solamente tin desconfiansa, sino retira mi como minister. Mi kier tende di e parlamentarionan, pasobra ta nan ta nombra y kita, nan ta e hefe di e minister.” El a bisa cu mester tin algo, no interno di e partido pasobra esey semper tin, pero den su maneho como minister, y esey e kier scucha. El a aclaria cu e carta di POR cu el a mira den Geschillen Commissie ta lista cuatro motibo pa cual a perde confiansa den dje, pero cu e no ta haya cu esey ta e motibonan berdadero.
El a bisa cu e lo defende su mes, e kier scucha nan pregunta y motibonan, pasobra no ta usual pa kita un minister. “Incluso ministernan cu ami tambe a firma contra nan, pero no a baha nan. Cu awe nan ta wordo investiga.”
A puntr’e si ta pa e medidanan disciplinario of suspensionnan cu a ordena den DIP ta busca su retiro. El a bisa cu esey tabata su responsabilidad como minister, pero e lo tende awe si esey tabata e caso.
“Den mi opinion, mi no a haci nada robes. No solamente parlamentarionan, sino pueblo en general merece sa e berdad.”
