Un siman a pasa caba di e tragedia cu a sosode den Latin Passions, situa Caya Capt. R Rodger 37, (San Nicolas). Mientras comunidad ta puntra su mes kico berdaderamente por a pasa den e sitio aki cu ta aparece riba VYMaps.com, como un Night Club, Spa, Adult Entertainment Service, Pub.

Ainda no tin mucho claridad riba kico exactamente a pasa cu e dos victimanan, Mia Figaroa (47) y Tio Lopez (42). Mientras cu rumornan a cuminsa circula si ta trata di un crimen, si of no.

Potret

Un potret cu ta mustra un di e victimanan den un supuesto plas di sanger a cuminsa lanta hopi speculacion riba kico por a sucede. Segun informacion divulga riba rednan social ta indica cu durante un declaracion di e doño di bar haci na medionan di comunicacion, e ta bisa cu den e bar tin hopi sanger. Sin embargo e potret cu a wordo divulga riba rednan social ta mustra cu aparentemente ta trata di un fake photo of un potret manipula cu no ta cuadra cu e realidad e sitio, unda e victimanan a wordo haya morto.

Informacion cu a drenta na e matutino aki ta indica cu niun di e victima tabata mustra señal di violencia. Of cu nan a wordo maltrata of hinca. Ademas no tabatin muestra di bringamento den e sitio, ni cos kibra ni plama. Un di e victima a wordo haya morto paden di e muebla cu ta separa e bartender di nan clientenan. E persona aki tabata mustra manera el a slip cay for di un stoel. Mientras cu e otro victima femenino si a wordo haya boca abou riba vloer. Considerando cu por a transcuri mas cu dia prome cu nan a wordo haya morto, esaki a haci cu e victima femenino su nanishi riba vloer tabata placha, manera el a wordo haya.

Te ainda no tin mucho claridad riba kico berdaderamente por a causa e morto di e dos persona aki. Tampoco e motibo pakico un potret asina a wordo plama y kico tin su tras. Ainda mester warda e resultado di e pruebanan forensico cu a wordo manda pa Hulanda den cuadro di e investigacion aki. E resultado di nan lo determina si no ta trata di otro cos cu a causa nan morto. Pero esaki ta algo cu e investigacion mes mester aclaria.

Te aworaki di e dos persona e causa di morto cu tin mas peso ta, cu nan a muri victima di intoxicacion cu monoxido di carbono (CO). Manera cuerpo policial a yega di informa pa medio di un comunicado di prensa den e sitio a presenta recherche, polis tecnico pa haci nan investigacion pa sa kico por a pasa cu exactitud. Pero tambe a wordo pidi presencia di brandweer. Nan prome accion tabata habri unda nan por habri pa asina laga CO sali for di e sitio.

E hecho cu tabatin un delco di gasolin patras di e establecimento cu for di diamars atardi tabata cendi pa cuminsa ricibi mas laat nan clientenan, a haci cu gas a cuminsa acumula keto bay den e sitio cera, cu e consecuencia fatal di dos persona morto, y dos mas cu a resulta seriamente afecta, pero nan a logra recupera. Esaki ta e prome version di kico por a sucede na Latin Passions. Mientras cu e dos curpa cu a wordo tuma den beslag pa investigacion forensico a wordo entrega caba na nan famianan.

Encuanto e otro dos persona cu a logra scapa di muri –segun informacion di polis– nan tabata dos hende muhe cu a wordo atendi y stabilisa pa personal di ambulance. Nan a wordo manda cu maximo urgencia hospital pa haya tratamento medico necesario. Tur cos ta indica cu e dos personanan aki por a scapa nan bida di milager, debi cu aparentemente nan tabata den e sitio mas laat cu e dos prome cu a fayece y cu a wordo afecta mas cu e gas venenoso aki.

Diahuebs 24 di juli den ora di madruga Cuerpo Policial a emiti e siguiente comunicado di prensa, algun ora despues di e suceso aki: Diaranson anochi pa 11:10 central di polis ta wordo notifica door di AC cu nan a haya un yamada cu na Latin Passions na San Nicolas lo mester a topa cu 4 persona den e bar cu ta for di tino. A manda patruya como ambulance y tambe brandweer na e sitio di e sucedido.

Na yegada en berdad a bin topa cu 4 persona, di cual 2 no ta duna señal di bida. Dos persona (hende muhe) a wordo atendi pa personal di ambulance y stabilisa y manda cu maximo urgencia hospital pa haya tratamento medico necesario. Na e sitio a presenta recherche, polis tecnico pa haci nan investigacion pa sa kico por a pasa cu exactitud. Tambe a pidi pa slachtofferhulp. Dr Texier a constata morto pa 1:30 di e Sra. M.F naci Aruba di 47 aña y e Mr. di G.L. naci na Aruba di 42 aña. Tur dos curpa a wordo confisca pa investigacion.

Tambe riba e mesun diahuebs siman pasa, e compania NV Elmar a bin cu un comunicado caminda nan ta bisa cu nan a tuma nota di e tragedia lamentabel cu a sucede na e bar na San Nicolas. Den e mesun comunicado NV Elmar ta bisa textualmente: “Tambe a tuma nota di declaracion di e propietario di Latin Passions encuanto presunto envolvimento di un trahado di Elmar referente conexion di un generator na e establecimento aki. Conforme Elmar su aansluitingsvoorwaarden, e compania su responsabilidad ta yega te na e meter di Elmar. Esey ta nifica cu N.V. Elmar no ta mishi den instalacion di coriente di e cliente. Como tal, conexion di un generator na e instalacion electrico di e establecimento no ta un practica of servicio permitibel di N.V. Elmar su trahadonan.”

Intoxicacion

Tin indicacion fuerte cu aparentemente e causa di e dos morto tin di haci cu intoxicacion di CO of monoxido di carbono cu por causa intoxicacion te morto. Practicamente e victimanan di CO ta muri den nan soño. E ta un proceso slow di intoxicacion of venenamento, caminda e gas ta cuminsa concentra den un ambiente cera. E victima ta drenta den un estado di soño pisa. Nan ta perde tino y si nan no ta wordo yuda na tempo, nan ta muri. Ya cu nan ta keda sin oxigeno y logicamente nan ta bira victima di e gas venenoso aki.

Esaki ta loke posiblemente por a sucede cu e dos victimanan. Seguramente e proceso di investigacion cu ta andando lo complementa mas detaye di e suceso lamentabel aki.