Minister di Enseñansa, Ciencia y Desaroyo, Rudy Lampe tabatin un comunicacion estrecho cu Obispo di Willemstand pa atende futuro di Colegio Arubano. Pero tambe rond di e signatura Catolico di e instituto educativo aki.
El a referi na e hecho cu obispado mas cu 50 aña pasa a funda Colegio Arubano. E tempo aya –segun informacion compila pa e corant aki- Colegio a bira un HBS (Hogere Burgerschool). E tabata carga e nomber di Colegio Arubano, H.B.S. Catolico Romano pa tur creencia (religioso). (R.K. H.B.S. voor alle gezindten) na Aruba.
E mandatario a bisa cu e scol aki ta un iniciativa Catolico, y el a keda cu e signatura Catolico. P’esey den tur e deliberacion aki, Monseñor Secco tabata envolvi, caminda a haci un apelacion na su persona. E apelacion tabata pa tuma na consideracion su carta tocante e identidad Catolico di Colegio Arubano. E ta dispuesto pa reconsidera esaki, segun minister Lampe.
Tambe el a laga sa cu Obispado di Willemstand a institui -riba su iniciativa- un comision di tres persona kendenan lo keda encarga di sigui delibera riba loke ta e identidad Catolico di scolnan na Aruba. E comision aki lo haci su trabao banda di e trabao cu e directiva nobo di SVOA lo eherce den e proximo lunanan.
Sinembargo e anuncio haci pa minister Lampe, y tambe un carta di Obispado di Willemstand tocante identidad catolico di Colegio Aruba, a wordo cuestiona hopi durante e conferencia di prensa di gobierno ayera mainta.
Encuanto si Colegio Arubano lo cay bao maneho definitivo di SKOA cu ta encarga cu tur scol Catolico, minister Lampe a aclara cu finalmente e lo keda den man di SVOA. Sinembargo ainda lo bin un deliberacion riba identidad Catolico di Colegio Arubano. Pa tal motibo Obispado di Willemstand lo institui un comision pa reconsidera nan posicion.
Independientemente di Colegio Arubano su historia y fundacion dor di clero Catolico, e institucion di enseñansa secundario aki desde su apertura na 1962 den su edificio actual, ta habri pa tur creencia, y te hasta pa esunnan cu no tin creencia. E hecho cu a bin cu un directiva nobo di SVOA y un rector nobo pa trece mas trankilidad y union den e ambiente escolar aki.
Nota di redaccion:
Nos por observa cu e intencion lansa den e declaracion di un dia anterior tocante e acuerdo entre ministro, Obispado y SKOA, unda a referi na e posibilidad di pone Colegio Arubano definitivamente bao di e fundacion netamente Catolico SKOA, no a conoce un bida largo, tumando na cuenta e ultimo declaracion aki duna ayera unda a logra pa SVOA por continua como fundacion riba su mes. Asina mes mester warda te cu e comision nombra pa Obispado bin cu nan evaluacion encuanto e signatura Catolico di e scol, kico esey ta bay encera, unda ta importante pa tuma na consideracion tambe e desaroyo di e scol durante casi 60 aña. Tambe mester considera cu ta Obispado mes na 2013 a bay di acuerdo pa hala atras y tuma solamente un asiento den e directiva di SVOA, un señal cu hopi por a tuma como un señal cu Iglesia a reconoce e caracter habri di e scol durante mayor parti di su existencia. Lo mas importante cu mester tuma lugar awor ta cu e scol ta haya espacio pa bolbe na normaildad, algo cu pa hopi tempo a haci falta.
