Un reduccion retroactivo di 11 porciento pa gasto di tur dokter di cas ta insostenibel y inaceptabel. Y si no yega na otro entendimento, e servicio di dokternan di cas lo baha cu un dia. Esaki ta e mensahe cu Asociacion di Dokter di Cas, HAVA a manda bisa Organo Ehecutivo di Seguro Medico Genera, AZV.

“Si no hala e decision aden, HAVA lo expande e servicio medico di fin di siman cu un dia adicional. E ta nifica cu Dialuna awor, dia 27 di Juli, esnan cu mester servicio medico, mester acudi na e consulta di dokter di cas na warda, sea na Playa of San Nicolas.” ta locual Joaquin van Trigt, Presidente di HAVA a bisa Bon Dia Aruba.

Decision unilateral

Motibo di e paso tabata cu AZV a corta den e pago na dokternan di cas den forma unilateral y cu un porcentahe mas halto cu tabata discuti. Manera ta conoci, AZV mester corta den su gastonan cu cinco miyon florin pa luna y a cuminza delibera cu tur dunado di servicio. E reduccion di gasto tabata un di e condicionnan di Hulanda pa Aruba ricibi sosten di likides. Sinembargo, asina mes, e decision di AZV dirigi na dokternan di cas a dal pisa.

“El a cay manera un sorpresa. Nos tabata ainda den deliberacion riba e 5.5 porciento di reduccion. Anto pa haya nos confronta cu 11 porciento,” ta locual Presidente di HAVA dr. Joaquin van Trigt a bisa Bon Dia Aruba. Dr. van Trigt a bisa di t kier ta solidario den e situacion di crisis, pero no por ta asina cu dokternan di cas, cu ta e prome liña di cuido ta haya un cuenta asina grandi. “Nos no por ta de acuerdo cu e medidanan manera AZV kier implementa, pasobra esaki lo afecta e calidad di cuido drasticamente.”

Otro gasto

Segun HAVA, e ta importante pa realisa cu e situacion di dokternan di cas ta diferente cu por ehempel Hospital. Dr. Horacio Oduber Hospital ta ricibi un asina yama lumpsum tur luna for di cua ta paga su gastonan. Y hospital ta determina con ta uza e fondo. Di e suma cu ta ricibi ta paga salario di specialistanan, di enfermeronan y otro personal y otro gasto. Un specialista cu ta cay bou hospital ta ricibi un salario, y no mester preocupa cu otro gastonan. “E no mester paga huur, hipoteca of seguro, ni salario di assistentnan.” Di otro banda, dokternan di cas tin gastonan mensual halto. E cortamento di 11 porciento, ta nifica un deficit grandi den entrada cu ta pone cu no ta resta fondo pa cumpli cu tur gasto. Y si no por cumpli cu tur gasto di oficina, no por paga assistentnan nan salario completo y dokternan e ora no por garantisa cuido optimal.” Pues HOH ta haya 5.5 porciento menos y di eynan ta paga salario. Si mester baha gasto, hospital tin mas espacio pa hunga cune . E specialista di HOH cu no mester paga huur, ni seguro, ni salario na otro personal, ta mira un reduccion di 5.5 porciento riba nan salario. Pero dokternan di cas ta mira un reduccion di un suma for di cua mester paga huur, of hipoteca, seguro, y salario di assistent y nan mesun salario. Y tin gasto cu ta fiho, manera hipoteca, huur y seguro.

“Durante ultimo periodo, mayoria di dokter di cas no a corta a corta den salario di assistent. Al contrario, a corta den nan mesun salario. Y e cantidad cu a corta ta mas cu e 5.5. porciento. Den caso, a hasta corta te 20 a 30 porciento. Nos pregunta ta di con a bay hasta mas leu, e redoblacion di locual AZV kier corta.” HAVA no ta exclui cu ta bay busca conseho huridico pa e punto aki.

Momento inoportuno

Segun van Trigt, HAVA tambe a presenta sugerencianan, pero ta mustra comosifuera cu AZV no a acepta ningun. “E idea ta pa trece reforma. Hulanda a pidi reforma y pa baha gasto cu 35 miyon. Pero AZV a dicidi pa corta 40 porciento den e entrada di dunadonan di cuido, entre otro locual ta pasa pa hospital. Nos ta haya cu esey ta hopi prematuro. Ademas e no ta trece reduccion structural.”

Van Trigt a sigui bisa cu esaki no ta momento pa bay corta den e gastonan di e cuido primario. Pasobra ta net dokternan di cas, cu ta e prome liña di cuido ta mas esencial. Y ta awor mester di fondo pa sigui brinda servicio y e cuido necesario den e tempo di crisis aki. Si corta den e prome liña, hopi mas hende lo bay hospital, cu ta mucho mas caro y lo costa AZV mucho mas. HAVA no ta mira e hustificacion. “Nos a bisa AZV cu unicamente si kita e reduccion di 11 porciento, cu nos ta dispuesto pa sigui delibera.”

HAVA ainda ta den combersacion cu Minister di Salud Publico y hasta a manda un carta pa Tweede Kamer di Hulanda, pa cuestiona e decision pa forsa Aruba pa corta gasto den cuido medico net den tempo di crisis. “Pero ta parce cu Hulanda no tin comprension pa e situacion di Aruba.” Y AZV no tin comprension pa e posicion di dokternan di cas, pasobra en bes di a pasa pa otro medidanan manera introduccion di contribucion propio (eigen bijdrage), cu ta un decision politico duro, ta dicidi pa corta den entrada di dokternan di cas y otro dunado di servicio.

E ultimatum ta cuminza cu un dia adicional di servicio di warda, pero si no yega na un entendimento, HAVA no ta exclui cu ta amplia e dianan cu no ta bay traha normal.

Bon Dia Aruba a compronde cu otro asociacionnan no a tuma un decision concreto ainda y nan ta den negociacion cu AZV pa loke ta e cortamento den nan gastonan.