Presidente di ASOCOL, Moises Fernandez: No tin nada di celebra mirando situacion di Covid na Colombia

Dialuna mainta, Asociacion Amigos de Colombia (ASOCOL) a organisa cu un ceremonia senciyo di ponemento di ofrenda floral y hisamento di bandera di Colombia y Aruba riba Plaza di Gradicimento den cuadro di Dia di Independencia di Colombia.

Presidente di ASOCOL, Moises Fernandez hunto cu Karen Reyes kende ta secretaria di e asociacion, y Minica Fajardo kende ta un Colombiano trahando den Comite Olimpico, nan a presidi e ceremonia aki. Tabatin presencia di un grupo chikito di Colombiano cu a dicidi di uni na e conmemoracion e di 210 aña di independencia di Colombia. Nan a dicidi di haci’e riba nan plaza situa dilanti di PriceSmart. Antes nan tabata organisa e tipo di ceremonia aki riba Plaza Simon Bolivar.

Considerando cu 20 di juli ta un dia historico, caminda Colombia ta recorda nan heroenan di independencia, y esun mas principal ta Simon Bolivar, dicon no a wordo poni e ofrenda floral dilanti di e monumento di dje. Fernandez a laga sa cu nan a dicidi di haci’e riba Plaza di Gradicimento, ya cu e ta e sitio cu pais Aruba a concede na e comunidad Colombiano pa nan tin’e como nan plaza pa celebra tur su eventonan. Mientras cu e Plaza di Bolivar ta di e asociacion di Venezuela.

Esaki ta e hecho cu nan a dicidi di pone e ofrenda floral dilanti di escultura di e homber condor, y no dilanti di escultura di nan heroe di independencia di Colombia. Fernandez a bisa cu e parha condor ta un simbolo di Colombia su escudo. P’esey nan a dicidi di bin cu e escultura aki. “E condor ta e parha di e simbolo patrio di nos pais.” Nan plan ta esun di sigui embeyece e plaza aki, caminda nan lo kier bin cu un figura di Simon Bolivar tambe.

E construccion di e plaza aki a wordo haci cu donacion cu ASOCOL a yega di ricibi den pasado. E directiva actual su intencion ta pa bin cu mas mehora, entre otro un area di recreacion pa e muchanan. Pero prome nan mester yega na e fondonan necesario pa embeyece mas e plaza aki.

Antes plaza di Bolivar tabata escenario pa celebra 20 di juli debi -segun Fernandez- cu nan plaza di Gradicimento no tabata den bon condicion. Pero nan a cuminsa haci cierto reparacion pa pone e plaza optimal, y nan a dicidi di haci uzo di dje. “Nos lo hiba nos celebracion den nos plaza. Esaki ta e plaza di pais Colombia y esaki ta e plaza di Asociacion Amigos de Colombia.”

Sin celebracion

Presidente di ASOCOL ta haya cu na momento cu nos ta pasando aden no tabata corecto pa nan organisa un celebracion siendo cu den principio no tin mucho cos pa celebra. El a referi cu e situacion na Colombia ta hopi delicado pa causa di Covid. “Ami no ta kere cu celebracion ta na su luga na e momentonan aki,” el a bisa.

El a lamenta cu e biaha aki nan no por a realisa nan celebracion manera tur aña, unda nan ta organisa actividad pa recauda fondo debi na e situacion di Covid cu henter mundo ta pasando aden.

Segun Fernandez no tabata responsabel pa ASOCOL organisa un evento grandi. Mas bien nan a dicidi di respeta e protocolnan pa no compromete salud di hende.

El a cuestiona cu tabatin otro actividad cu a wordo realisa pa celebra Dia di Colombia, sin tene cuenta cu distanciamento social.