E aberacionnan di un sistema socialista no ta stop di sorprende otronan cu no mester biba den un sistema asina. Un ciudadano di Pinar del Rio a keda condena na un aña di privacion di libertad, subsidia pa trabao coreccional sin internamento, y pago di 3.000 peso pa bende su turno pa drenta den e tiendanan nobo cu ta bende na divisa.
E persona identifica como Michel Delgado Blanco, a ser acusa pa fiscalia municipal di e delito di “actividad economico ilicito”. Segun informacion di website di e emisora Radio Guama, Delgado Blanco a keda deteni pa agentenan di Polis Nacional Revolucionario dia 25 di juni, despues di a bende pa 30 CUC (dollar Cubano) e ticket pa drenta pa cumpra mercancia den e tienda La Capitana, unda mester paga cu divisa.
Pa e delito aki e tribunal municipal popular di Pinar del Rio a sanciona Delgado. Segun opinion di e fiscal hefe provincial Lazaro Guzman Diaz, “a actua di acuerdo cu loke ta estableci den Codigo Penal, cu respet pa garantia di derecho di e partidonan.”
Siman pasa a reporta un caso similar, tambe na Pinar del Rio. Dos muher, identifica como Vivian Clara Castillo Suarez y Alioska Danay Echevarria Castillo, a keda aresta fin di juni na e mesun tienda, unda nan tambe a bende nan ticket pa drenta den e tienda, pa e mesun 30 CUC.
Nan a haya mesun castigo cu Delgado. Na nivel nacional autoridadnan ta realisando un ofensiva contra e asina yama ‘coleros’ cu ta e personanan cu mas bien ta den rij pa cumpra mercancia pa despues bende esaki mas caro, y no esnan cu ta purba gana riba un ticket di entrada.
