Segun un medio di comunicacion local, den un carta interno compania Serlimar a informa contratistanan trahando den e proyecto ‘Mantencion Bo Bario’ cu lo tin un adaptacion den nan orario di trabou.
Segun un relato di e portal 24ora ayera nochi, tabata den un carta cu fecha di 20 juli 2020, cual ya a bira conoci, Serlimar a dirigi su mes na tur contratista independiente, cu tabata trahando den e proyecto ‘Mantencion Bo Bario’, informando nan cu nan lo traha menos ora, y cu esaki tambe nan lo ricibi menos pago.
E motibo lo ta cu e compania ta purbando di baha gasto y salba su operacion.
Segun 24ora, director di Serlimar, Anko Koopman a recorda e contratistanan di e situacion dificil cu e compania ta pasando aden, cu tremendo retonan financiero incluyendo Surceance van Betaling, pa cual ta purbando di reduci e mayor cantidad di gasto posibel.
Ademas, tambe ta reduci orario di contratistanan cu ta traha banda di caminda of ta mantene bario limpi. E cambio di orario ta cu awo lo traha 8 ora riba dialuna, diamars y diaranson, y solamente cuatro ora riba diahuebs y diabierna. Asina e compania ta reduci 8 ora di trabou den siman, cual ta coresponde na un reduccion di 20% di e pago mensual.
Den esaki tambe a pidi comprension di e contratistanan, mirando e situacion sumamente dificil cu e compania ta pasando aden.
