DVG cu motibonan valido pakico ta pidi ‘retest’ un persona na aeropuerto

Durante un conferencia di prensa di Sharline Koolman di Departamento di Salud Publico (DVG), el a splica con e proceso di prueba di Covid-19 ta na aeropuerto. Tambe el a trece dilanti con DVG ta maneha informacion medico di un ciudadano.

Sharline Koolman a specifica cu ora un turista ta yena e ID card, DVG ta haci algun tipo di preguntanan pa asina haya sa si e persona aki ta bin for di un luga cu tin un riesgo halto, medio of mas abou pa cu transmision y asina wak si esaki mester di algun adaptacion.

El a bisa cu e adaptacion no lo por hacie diario pa motibo cu mester wak den por lo menos un siman ki tendencia tin. A base di esey lo conseha si mester adapta cu medidanan drastico si of no.

Ora un persona ta yega Aruba y ta wordo pidi pa ‘retest’ ta motibo cu e persona a upload un otro tipo di prueba, cu ta serologic y no PCR, cu ta esun cu ta rekeri. Personal di DVG tin contacto cu e persona via e-mail pa informa cu e test mester ta esun cu ta wordo exigi.

A base di esaki, Koolman a expresa cu e personanan aki ta informa na e mesun momento cu e prueba aki no ta valido y na momento cu e ta yega na Aruba tin cu bolbe haci e prueba.

Otro caso cu Koolman a splica ta cu un persona por upload un prueba 72ora pasa, manera ta wordo pidi y na e momento cu e persona ta yega na Aruba e tin sintomanan. Na e momento aki tambe e mester haci e prueba un biaha mas.

Hopi pregunta a bin dilanti pa loke ta trata e personanan cu ta bin for di zona cu riesgo halto na Merca cu por a drenta y ta haci e prueba na Aruba. Dicon e persona no a wordo getest prome cu e ta bin ta un di nan y p’esey e ta duna e splicacion aki.

Koolman a comenta cu mester tene na cuenta cu esaki pa via cu hopi preguntanan ta wordo haci y na cierto luganan na Merca ta dificil pa haya e prueba PCR of e ta dura di 4 pa 5 dia pa e persona por haya e resultado. Pa e motibo di e zona cu tin mas riesgo nan ta dicidi ki tipo di prueba nan ta exigi. “Un PCR test di mas cu 72ora no ta duna bo un bista di e persona su salud na e momento ey.”

Ademas, el a declara cu den tres dia e persona por desaroya e sintomanan y ora e ta yega aki tin dolor di garganta of un otro sintomanan cu mester bisa pa bay pa screening. Si e dokter cu ta atende cune no ta confia den esey lo haci e test di nobo. “Tur e esaki ta motibo valido pa nos ripiti e prueba y e persona mester bay cuarentena te ora cu e haya su resultado.”

Pa DVG, segun Koolman a splica esaki a traha hopi bon, den sentido cu nan a haci e prueba atrobe pa algun persona. Hopi di nan a sali negativo pero tambe tin casonan cu a sali positivo di turistanan y personanan residente.

Tambe, Koolman a trece dilanti cu nan na momento cu nan ta haya casonan positivo, nan no ta bay den detaye cu e informacion di e persona cu ta contagia. Ciudadanonan mester tene cuenta cu tin mas caso di Covid-19 y nan tin cu cuida nan mes. Segun el a sigura, DVG ta respeta e persona su informacion medico.Si a caso e informacion medico y personal ta un riesgo pa e comunidad nan mes lo evalua y si no ta revela e informacion, ta pa motibo cu te ainda e persona no ta un menasa pa salud publico en general na Aruba.

Di otro banda, comunidad a haya sa mediante algun medionan di comunicacion local e informacion di un persona cu supuestamente a wordo contagia cu Covid-19 y tabata cana rond cu e virus, algo cu tabata representa un riesgo pa e comunidad. Pa cu esaki, DVG a ofrece un comunicado den cual nan a informa cu e noticia ey no tabata cuadra cu berdad y cu nan ta lamenta cu nan a publica identidad y potret di e ciudadano sin verifica cu DVG.

E Crisis di Covid-19 coronavirus ta algo sumamente serio cu tin efecto no solamente riba e salud fisico di e pashent pero tambe riba su salud mental di henter nos comunidad. Asina mes nan a señala cu DVG semper ta dispuesto pa suministra of confirma informacion pero mester tin comprension tambe pa cantidad di informacion cu por duna, na e momentonan aki ta papia di Covid-19 pero tambe tabata existi malesanan infeccioso cu segun Koolman a bisa nan nunca a publica informacion medico di ni un hende pa lo cual nan ta deal cune di un manera profesional.