Presidente di Jordan Ling Foundation, Clifton Ling, a duna na Bon Dia Aruba un balans positivo di e evento: “Mental Health Awareness Conference” cu a tuma luga diasabra ultimo.
E ta bisa cu e acogida a resulta uno exitoso, ya cu e personanan registra a bin y plus algun mas. Nan a acomoda como 270 hende y hasta hendenan cu a bin y cu no tabata registra, nan mester a bisa cu e luga tabata yen caba. Ademas e topiconan cu e oradonan a trece dilanti tabata interesante y specialmente e publico tabata participa y expresa nan gratitud pa e fundacion aki.
E ta haya cu hopi hende tin e salud mental como algo cu nan no kier papia di dje, pero aparentemente door di e acogida di e conferencia aki, e problema aki ta un echo den e pueblo di Aruba. Aunke e topico aki a wordo papia abiertamente den e conferencia aki, Sr. Ling no ta kere cu e taboe riba e topico aki a wordo kibra totalmente. Pero a lo menos a wordo habri un buraco chikito encuanto importancia di salud mental.
“Mi no ta kere cu e stigma ta bay di biaha, pero poco, poco nos ta logra e meta di bira liber di stigma.” E ta spera cu den futuro e hendenan por papia abiertamente riba salud mental, ya cu ainda pa hopi hende e ta un berguensa pa expresa nan mes, specialmente si e ta toca nan famia.
Paaz bou un otro fundacion
E ta spera cu e congreso aki lo bira un step pa cuminsa logra e meta di ta liber di stigma riba salud mental. El a haya e anuncio haci pa minister Alex Schwengle di Salud Publico tabata interesante tocante un fundacion cu ta bay ubica PAAZ bou di nan y departamento psikiatrico y tambe e otro servicionan social cu tambe ta cay bou di dje. E ta haya cu kisas e cambio aki lo por habri mas porta y mas oportunidad pa e cuido por bira mas amplio.
Despues di forma parti vital pa organisa e conferencia aki, Jordan Ling Foundation ta papiando cu un grupo chikito di scol cu nan kier organisa algo pa fin di aña den e mesun direccion. Sr. Ling ta kere cu den futuro e fundacion lo bay pensa y evalua riba ki direccion nan lo bay tuma, y eventualmente otro aña hunto cu AZV nan lo forma parti di e conferencia riba salud mental.
Preocupacion
Jeroen van Geest di departamento di PAAZ na hospital ta bisa cu e hendenan a participa di un manera interactivo den e conferencia aki. Durante e preguntanan el a por ripara cu tin hopi preocupacion cu e hendenan mes kier a comparti. “Esey pa mi ta un prome paso den e proceso di yega un dia di kibra e stigma of taboe cu tin riba e problema di salud mental.
Un preocupacion tin di haber cu hopi hende ta haya cu no tin suficiente ayudo pa e tipo di problema aki na Aruba. Tambe e por ripara cu no tur hende sa exactamente con pa yega na e ayudo cu si tin na Aruba.
Igualmente algo cu a resalta ta cu henter comunidad tin preocupacion pa e hubentud di Aruba. Specialmente esaki a resalta durante e presentacion di Misha Raymond di Kinder en Jeugdpsychologie na Horacio Oduber Hospital riba e muchanan bou 18 aña y nan tendencia pa suicidio.
Jeroen van Geest a expresa su satisfaccion pa tur e hendenan cu a atende e conferencia aki y a mustra nan interes. E tendencia aki crea un ambiente positivo y di speransa pa otro aña nan lo por bin bek cu otro evento di e caliber aki. Pero obviamente esaki mester wordo papia cu tur e partnernan envolvi, ya cu el a sinti cu e pueblo a haci un pregunta cerca nan, esta: nos kier mas informacion.
“Nan kier cu lo wordo involucra mas y nan kier duna nan opinion, y mi kier sa cu esaki ta algo cu nos no por nenga.”
Hospital
Ezzard Cilié, director di cuido di hospital a bisa di a keda impresiona di e cantidad di participantenan, considerando cu esaki ta apenas e prome evento. Mas ainda Hospital ta aprecia cu e iniciativa a nace boluntario for di famia Ling.
Mester tene cuenta cu Hospital tin un departamento special, yama PAAZ, cu a desemboca den un organisacion cu no ta traha solamente mas pa locual e ta existi, sino ta bay hopi mas leu den nan servicionan. E conferencia organisa, ta un prome paso pa PAAZ por comparti cu publico nan servicionan y kico mas nan lo por haci pa yuda y sostene pashentnan cu problema mental.
Ezzard Cilié a palabra cu Sr. Clifton Ling cu esaki ta djis e comienso y cu Hospital ta mira Jordan Ling Foundation como un partner pa sigui desaroya programanan y eventonan pa conscientisa comunidad den futuro.
Na final Renate van Dongen, Zorgmanager na PAAZ ta convenci cu mester aumenta esfuersonan di conscientisacion pa cu salud mental y e conferencia aki tabata ideal y bon organisa.
Un cantidad di hende a participa y hopi a yama pa pidi pa mas di e tipo di eventonan asina. E experto riba tereno di salud mental a admiti cu na Aruba publico sa masha poco di enfermedadnan psikiatrico y no sa tampoco unda pa bay.
Por medio di e conferencia aki awor mas hende sa unda por bay, unda por haya mas informacion y kico pa haci ora nota sintomanan. Ta bon pa tur hende sa cu tin ayudo pa e enfermedad aki, pero pashentnan mester identifica cu tin un problema y despues acepta cu mester ayudo profesional.
