Trahadonan di sector horeca ta acudiendo na Dienst Warenkeuring en Hygiene pa saca nan carchi di salud, conoci como carchi berde cu recientemente a conoce un version mas moderno. E carchi di papel di antes a bay den historia y awor a bira un carnet digital.
Hefe di e departamento aki, Yvette Geerman a declara na Bon Dia Aruba cu nan a logra digitalisa full e proceso aki. Ademas e servicio aki ta wordo centralisa den nan seccion di departamento di Salubridad Publico (DVG). No tin otro instancia cu ta duna e servicio aki. “Tur cos ta wordo canalisa via di nos,” a bisa.
E persona interesa ta haci nan cita online. Unabes cu tur cos ta cuminsa e proceso aki ta caba di finalisa den tres siman. Si nan ta cumpli cu tur exigencia y si tur cos ta sali completamente bon, el a bisa. Solamente asina nan ta bin na remarca pa e carnet di salud.
Aworaki nan ta dunando carnet y tur informacion ta keda digital. E ta algo mas safe. Despues di un par di añanan trahado riba dje, finalmente e departamento aki a bay den direccion di automatisacion di nan servicionan y procesonan. Kiermen tur loke tin di haci cu peticion di e carnet nobo di salud y renobacion.
A pesar cu sector horeca a wordo afecta fuertemente pa consecuencia di e Covid crisis, Sra. Geerman a indica cu e control di higiena ta wordo realisa y practicamente nunca a para. Tin continuacion y e lo sigui continua tambe.
Naturalmente e departamento a keda un temporada cera y nan no por a duna servicio tampoco. Sinembargo e control di higiena den establecimento di benta di cuminda y bebida ta tumando luga keto bay. Den transcurso di aña, mas tanto pa final di aña, e control ta bira mas stricto, el a laga sa.
E temporada actual nan ta interpreta como un dunamento di espacio pa e hendenan por cumpli cu nan compromiso. Pero si un persona trahando den e sector horeca nunca a saca un carchi di salud, den e caso aki e departamento no ta duna niun dispensacion.
Sinembargo considerando e situacion cu nos ta aden, nan ta dunando un tiki di dispensacion. Esta mientras cu nos sectornan economico ta cuminsa reactiva, y tambe cu nan departamento por duna servicio shen porciento.
