Pa por mantene e balor di florin stabiel pa dollar, Gobierno mester percura pa mantene su maneho fiscal bou control. Esey tabata locual Johannes de Beaufort Wijnholds, Director Ehecutivo di Fondo Monetario Internacional IMF a bisa na ocasion di apertura di edificio nobo di Banco Central di Aruba na november 2002.

E palabranan di De Beaufort Wijnholds ta hopi al caso, mirando e proposicion di Hulanda pa evalua si mester elimina florin y introduci dollar como forma di pago na Aruba.

Aruba a scoge pa establece e florin na un balor fiho di dollar. Panama di otro banda a scoge pa dollar y otro paisnan a scoge pa usa dollar como base pero sin cu balor fiho.

De Beaufort Wijnholds a bisa cu tin e filosofia cu ta sugeri cu den caso di Aruba, unda ta mara e florin na e moneda Mericano, ta dificulta e absorbacion di shocknan cu ta sosode den mercado internacional asimetrico. Tin beneficio sigur, particularmente si ta usa e moneda, den e caso aki, e dollar, di e pais cu mas ta haci negoshi cune.

E ta implica si cu ta importa tambe e inflacion di Merca. Pues Aruba mester tin e disciplina pa purba mantene su inflacion na e mesun nivel cu dollar. Tambe e lo yuda si e economianan ta enfrenta e mesun tipo di shocknan, esta disturbio den e mundo financiero.

Pero pa florin, y sigur su balor ta stabiel y sostenibel, e ta rekeri un maneho fiscal cu ta bou control. Pasobra un debe publico cu ta crece, e probabilidad di devaluacion tambe ta aumenta. Locual tambe ta yuda balor di florin mara na e dollar, ta si productividad keda subi constantemente. Den caso cu productividad na Aruba tabata mas halto cu esun di Merca, lo tin fluho di dollar den nos economia y mester ahusta e maneho monetario pa un caso asina. Pero, si productividad na Aruba ta mucho mas abou, e peliger ta cu capital local lo bandona nos pais y mester restringi e maneho monetario. Recientemente Banco Central di Aruba a pone un control y hasta limite na e cantidad di placa cu por manda pa exterior. Na 2002, Johannes de Beaufort Wijnholds a bisa cu pa inversionistanan tin confianza, nos florin mester tin credibilidad y cu nos institucionnan ta fuerte. Nan lo mester percura cu tin e disciplina necesario pa sostene e cambio di florin riba dollar. “Un sistema aki ta un bon manera pa reenforsa e disciplina monetario y fiscal, pero mi no ta kere cu e por crea un disciplina asina unda e no ta existi.”

Den practica

E ehecutivo di IMF e tempo ey a papia hopi di Argentina cu a conoce hopi disturbio economico y financiero, y hasta a usa e dicho na Hulandes, “Zachte Heelmeesters maken Stinkende Wonden.” Aki el a referi na manehonan hopi debil di Gobierno cu na final a empeora e crisis Argentino. Na 2002, Aruba tabata miho para cu Argentina. Su criteria pa mara florin na dollar tabata mas fuerte. Y hopi tin di haci cu e naturalesa di economia (di turismo) di Aruba, cu pa gran parti ta cu y di Merca. “Tur e caracteristicanan aki ta haci cu Aruba ta un candidato natural pa mara florin na dollar Mericano, pero e no ta sigura su exito continuo. Pa e moneda keda cu e balor fiho, Aruba mester di manehonan fuerte y cla. Mester di institucionnan decisivo.”

De Beaufort Wijnholds na principio di 2000 a ilustra e comienso dificil di Aruba como pais, pero cu a pesar di tur reto a logra crece su economia cu turismo. Pero caida den e Producto Bruto Nacional na 2000, a produci mesora un deficit presupuestario publico grandi. Gobierno e tempo ey a anuncia intencion pa consolida su finanzas publico y e speransa tabata cu esey lo a keda implementa fuertemente. Pasobra e lo tabata crucial pa crece atrobe y mantene stabilidad.

Un di e institucionnan cu sigur a yuda cu florin a logra mantene su balor compara cu e dollar, tabata Banco Central di Aruba y e maneho monetario estricto. Particularmente mirando cu Banco Central di Aruba semper a purba di mantene un reserva di divisas hopi fuerte. “Y cu Presidentenan di Banco Central nunca a duda pa expresa critica fuerte riba manehonan macroeconomico di Gobiernonan di Aruba. Esaki tambe ta señal di su caracter independiente como institucion,” e ehecutivo di IMF a bisa na 2001. E institucion a logra esaki door di ta activo cu su maneho y adapta unda cu mester y consecuentemente a contribui na economia di Aruba y sigur a logra mantene e balor di florin na e dollar.

Landspakket

Awor, 18 aña despues di e discurso aki di Johannes de Beaufort Wijnholds, Hulanda ta propone pa studia e posibilidad pa Aruba stop cu su florin y pasa pa dollar. Parti di e proposicion ta cu Hulanda, y mas bien e Entidad di Reforma Caribense, lo mester guia e maneho financiero di Aruba. E ta nifica cu Hulanda ya no ta mira cu tin un stabilidad y disciplina fuerte necesario pa sigura cu florin no ta perde su balor compara cu e dollar. Y manera economistanan a señala na varios ocasion, unabes cu scoge pa dollar, e ta duna Gobiernonan poco espacio pa desvia di maneho financiero stringente, cu ta locual Gobierno Hulandes, pero tambe institucionnan manera Banco Central di Aruba ta urgi p’e.