BUMP Aruba enfoca pa yuda e mamanan den necesidad

Benefitting Upcoming Mothers during the Pandemic ‘BUMP Aruba’ ta un organisacion cu a lanta pa recauda articulonan pa baby y asina asisti mamanan y hende muhe cu lo haya yiu cu ta den necesidad durante e temporada di Covid-19, mirando cu hopi di nan a perde trabou.

Asina, a duna di conoce Kiara Arends, fundador di BUMP Aruba, kende a splica pa Bon Dia Aruba cu na cuminsamento e tabatin 5 mama cu e tabata sa cu tabata den necesidad. Arends a pidi pa su propio famia pa haci donacion pa e mamanan aki.

“Despues cu nan a haci donacion, mi a bin realisa cu mi a haya mas di locual tabata necesario pa e mamanan aki”, Arends a señala.

Mirando e resultado aki, Arends a specifica cu el a comparti riba Facebook un post puntrando si tabatin mamanan de necesidad, pa asina entrega loke tabata resta di e donacion ainda. Arends a informa cu esaki a sucede prome cu dia di mama. Mirando cu e acogida tabata hopi bon, el a pensa di haci un Drive Thru Baby Shower, na unda nan a colecta hopi articulo di baby como cama, carrier, box, pamper, lechi, etc.

Gran parti di e mamanan cu nan ta yuda ta hende muhe na estado, cu financieramente mester di ayudo pa asina yega na e cosnan pa e baby tin locual e mester na momento di su nacemento. Tambe el a ripara cu mamanan cu ya tin yiu tin mester di comestibel, pero tambe otro articulo, manera wipes, lechi, papa, tur esaki mester pa e babynan.

Despues cu a organisa e Drive Thru, Arends a bisa cu nan a yuda aproximadamente 90 persona riba dia di mama, cu macutunan. Despues di esaki el a ripara cu su trabou no a caba ainda.Arends a splica cu el a pone su cas disponibel pa famianan den necesidad por bay busca articulonan di baby y tambe pa muchanan di 1 pa 3 aña. Asina, despues diferente compania a dun’e baby food y lechi pa e por duna e personanan den necesidad.

Arends a trece dilanti cu esaki a bin tres siman despues di e prome medidanan pa Covid-19 pa loke el a sigura: “Esaki no a bin door di Covid-19. E pobresa tabata t’ey caba.” El a destaca cu e pandemia di Covid-19 a djis duna nan un rason pa busca ayudo.

Ademas Arends a referi cu e ta consciente cu esaki no lo keda te aki. “Nos mester sigui yuda y pensa kico nos por haci pa yuda e famianan aki y pa nan para riba nan mesun pia. Pasobra e pandemia a dal nos duro den nos economia, y principalmente e famianan aki, cu hopi di nan ta traha den zona turistico, cu a perde nan pan completamente.”

Arends tambe a laga sa cu nan ta traha hunto cu Fundacion pa Nos Comunidad. Articulonan cu ta resta di BUMP Aruba ta manda pa FPNC, y te na e momentonan aki nan a logra yuda tur hende cu a registra. Tambe algun persona cu a yuda caba y cu a pidi ayudo atrobe, pero “nos meta tabata pa yuda e mamanan cu cosnan esencial, cu ta necesario y cu por haya un biaha so, como box, carrier, etc”, el a afirma.

Ademas, el a relata cu nan tin den nan plan pa haci un evento – cu te ainda no ta concretisa door di e crisis Covid-19 – pa conscientisa y enfoca riba e mamanan cu ta den necesidad. Algo como un tayer, e idea ta mas bien pa wak con por yuda e mamanan cu mas di un aspecto. Conscientisacion pa no solamente e mamanan cu a haya yiu of cu ta na estado caba, pero e muhenan hoben tambe. Pa duna un tayer tocante por ehemplo, malesanan venerico, cu tambe por bira un forma di empodera y conscientisa e hobennan y personanan den necesidad.

“Pa asina bira un forma di guia con pa preveni problemanan social di sigui bira mas grandi na Aruba”, Arends a finalisa.