Steven Martina di Desaroyo Economico a anuncia cu a tuma un decision riba takeover di refineria Isla pa Klesch Group. Sinembargo na e momentonan aki no por bisa kico e decision ta encera. E minister ta spera cu pronto lo por duna mas informacion.

E dos simannan di extension cu gobierno di Corsou a duna Klesch Group pa splica con ta bay tuma over e refineria Isla, a pasa. Martina, den combersacion cu Elisa Koek, a bisa cu ya nan tin claridad riba e asunto. Sinembargo e mandatario ta menciona cu e cuestion ta algo ‘complica’, pues na e momentonan aki no ta dunando comentario riba e contendido di e situacion.

“Mi lo debe bo un contesta riba e punto ey, t’asina si cu ora nos haya cierto consehonan den termino corto nos lo por bay bisa cla con lo sigui.” E periodista a sigui puntra Martina si esey kiermen cu no ta bay sali di e acuerdo cu tin aworaki cu Klesch. Martina a contesta bisando cu hustamente ta esey e no por papia over di dje actualmente.

E parti complica segun e mandatario ta cu tin aspectonan huridico liga na e decision, pa cual rason no por bay publico na e momentonan aki cu e decision. E periodista a puntra, despues di e minister su contesta cu: “E ora ey mi por compronde cu boso ta pidiendo conseho huridico pa asina por stop cu e deal?”

Martina a contesta bisando cu e conseho huridico ey nan a haya di basta tempo caba, pero cu aworaki no por bay publico cu e dossier. “Nos ta actualmente liga na confidencialidad.” Si gobierno mester bay negocia cu Klesch ainda, Martina a contesta bisando cu “si, entre otro.”

E opcion cu lo tin riba mesa si ta e caso cu Klesch no lo sigui tuma over e refineria, ta cu lo cuminsa un procedura di destaho publico un bes mas. “Tin otro partidonan interesa ainda di e procedura cu nos a cana”, Martina a bisa.

E periodista a puntra cu si t’asina cu mester sali di e deal cu Klesch, si gobierno tin e recursonan pa paga e trahadonan cu t’ey actualmente. “Gobierno sigur cu no tin e recursonan. Pero RdK si tin e recursonan. A base cu tin fondonan tin un plan pa asina mantene e refineria mientrastanto, pa asina por habri eventualmente bek.”

Alternativa pa refineria scur, si habri bek por contribui 5.7% crecemento GDP
Koek ta sigui puntra si tin posibilidad pa duna un otro proposito na e refineria, mirando cu tin interes grandi pa sigui di e manera aki. Martina a bisa cu esey no ta posibel, mirando cu conseho di minister di Corsou ya a tuma un decision riba esaki caba. “Claro tin otro plannan, pero esey lo ta habri solamente si berdaderamente no por habri refineria di cualkier manera.”

Koek a puntra finalmente si habri e refineria ta di gran interes economico, y si en caso cu no habri refineria e ora ta papia di un problema serio. Martina a contesta bisando cu aworaki tin solamente mas o menos 450 trahado, pero si habri refineria, e ora ey tin un problema cu ta por lo menos bira menos problema. Na momento cu refineria cuminsa drey bek, e ora ey ta yena e cuponan di trabou aki di biaha, y ta crea hopi mas, algo cu no ta posibel si busca un alternativa.

“No tin otro alternativa cu lo crea asina hopi cupo di trabou actualmente. Pues esey ta e impacto. Pero bo mester bay pensa riba tur e servicionan liga na refineria. Por ehempel si nos pensa riba waf, actualmente e ta menos activo, mirando cu refineria no ta operando. Pues otro servicionan y otro actornan den economia diripente ta haya hopi mas trabou. E impacto ta hopi grandi. Nos a calcul’e, y e impacto riba economia ta 5.7% di nos GDP.”