Nos tin un innovacion nobo den e mision cientifico pa crea mochila miniatura di tecnologia halto pa animalnan. Musca, paloma y abeha tabatin nan momento. Awo ta ora pa beetle cu ta bisti camara panoramico miniatura.
“Nos a crea un sistema di camara wireless di energia abou, peso abou, cu por captura un perspectiva di prome persona di kico ta pasando den vision di un insecto bibo di berdad, of crea vision pa robot chikito”, segun Shyam Gollakota di Universidad di Washington, autor lider di un documento riba e sistema, publica den e journal Science Robotics ayera.
E universidad a revela un video cu ta resalta con e camara ta traha door di transmiti imagen blanco cu preto na un celular. E app tambe ta permiti investigadonan maneha e camara pa bir’e pa potret panorama.
E team a test e mochila riba un beetle ‘death-feigning’ y un ‘Pinacate’ y a monitor nan pa sigura cu nan por move sin obstruccion. E beetlenan no tabata parce preocupa pa e cantidad chikito di peso extra y nan a biba pa mas cu un aña despues cu e proyecto a termina.
“Esaki ta prome biaha cu nos por a mira di perspectiva di lomba di un beetle mientras e ta cana rond”, segun co-autor Vikram Iyer.
E camara ta capaz di traha pa mas di seis ora riba bateria ora e ta usa cu un acelerometer cu ta trigger e camara unicamente ora e beetle ta move. Versionnan den futuro por usa energia solar. E camara ta traha riba robot miniatura ademas di insecto. E investigadonan a bisa cu a construi ‘e robot terestre mas chikito di mundo, di energia autonomo y vision wireless’ pa e proyecto aki.
E roboto ta move a traves di vibracionnan, maske mester pausa su movementonan pa tuma un imagen stabiel cu e camara.
E sistema di camara pa beetle no ta solamente adorabel. E por yuda cientificonan haya sa mas tocante insecto y con nan ta reacciona cu nan medio ambiente. Tambe por mustra riba un forma nobo pa compila visual den areanan dificil pa yega.
