Organisacionnan den cuido medico: “Corta Afl. 5 miyon tur luna tabata un ekibocacion”

Gran parti di e organisacionnan cu ta activo riba tereno medico a manda un carta pa miembronan di e Comision Permanente di Relacion den Reino di Tweede Kamer, pa expresa nan preocupacion pa e reciente medida tuma na Aruba pa corta gasto di AZV cu Afl. 5 miyon pa luna, riba conseho di CAft, pero cu segun nan ta basa riba un kibocacion na Hulanda, ora a stipula e condicionnan pa Aruba haya ayudo.

Segun e carta, no tabatin ningun argumento di contenido pa e medida aki, tampoco den e conseho cu secretario di estado Raymond Knops a manda pa Conseho di Ministro di Reino. Consecuencia di e reduccion aki lo ta cu cuido na Aruba ta den problema grandi, y lo no por garantisa acceso ni calidad mas. E sector a traves di e carta aki ta pidi apoyo di e Comision pa coregi e eror aki. E tranquilidad cu esey por trece den e sector lo por duna tempo pa conhuntamente, di manera constructivo y inteligente pensa riba e formanan pa logra mas eficiencia den e sistema di cuido di Aruba.

E firmantenan di e carta ta kere cu mester tin un ekibocacion den wega, ya cu como unico den Reino, Aruba a ser confronta cu e exigencia aki, cu tin como meta pa corta Afl. 35 miyon durante loke ta keda di aña 2020. E austerisacion aki ta significa 13% di e gastonan di cuido mensual, mientras cu por argumenta cu den cuido lo tabatin hustamente mas gasto, mirando e implicacionnan di e crisis di Coronavirus, ademas di e gastonan aumenta den cuido mental.

Di otro banda ta reconoce e necesidad di traha mas eficiente y mihor den e sistema di cuido di Aruba, pero no ta mira e motibo pa austerisa di e manera drastico aki na e momento aki. Ta señala tambe cu na e momento aki varios di e partidonan ta den consulta pa mira kico ta e medidanan cu berdaderamente por trece mehoracion den e sistema, pero cu e medida tuma awor e espacio pa haci esaki a keda elimina.

Tambe ta señala cu e promedio di gasto cerca AZV pa cada asegurado ta mas o menos 30% mas abao cu Hulanda, mientras e cobertura ta casi igual. Ta constata cu e diferencia aki ya caba a conduci na subinversion structural y falta di suficiente reserva financiero cerca e institucionnan cu ta ofrece cuido. E austerisacionnan cu AZV ta obliga di ehecuta awor lo tin como consecuencia cu no por garantisa e calidad minimo medicamente requeri. Y e contribucion propio introduci pa varios servicio lo tin como consecuencia cu net esnan cu ta mas vulnerable lo mira nan acceso na cuido limita. Ademas esaki ta pone extra peso riba esnan cu ta ganando e sueldonan mas abao, loke por aumenta e problemanan financiero di esnan mas vulnerable.

Ademas ta parce, segun e firmantenan, cu tur esaki ta debi na un kibocacion. Loke a sucede ta cu CAft a menciona solamente un reduccion di un solo biaha di Afl. 5 miyon, mientras cu despues den e carta di Knops esaki a bira un suma cu ta bolbe mensualmente, como condicion na Aruba pa haya ayudo. Como posible splicacion pa e eror aki e firmantenan ta señala cu CAft ta referi den su conseho explicitamente na un rapport di PWC di november 2019 den cual ta bisa cu e gastonan creciente di AZV ta causa pa ‘vergrijzing’ y por lo tanto ta dificil pa asumi cu CAft ta di opinion cu por corta significativamente den gastonan di cuido di Aruba. Ta mas probable cu CAft lo a tuma como punto di salida un bahada temporal den gastonan di cuido causa pa e periodo di ‘lockdown’ unda hende tabata keda cas mas.

Despues, a base di ausencia di un splicacion explicito di CAft, na ministerio di Asunto Interior y di Reino lo a pensa cu, ora e stipula e condicionnan pa e suma pa un periodo di pago, cu esaki lo ta conta tambe pa cada periodo cu sigui. Cu consecuencia desastroso pa cuido medico na Aruba, segun e firmantenan. Ta bisa tambe cu ta kere tambe cu ta trata di un eror, pasobra lo ta inimaginable cu esaki a sucede a proposito. Y como cu no tabatin espacio pa splicacion o negociacion, gobierno di Aruba a acepta e condicion. Finalmente, ta pidi colaboracion di e Comision pa yuda averigua con a yega na e reduccion structural den AZV y si acaso esaki en berdad ta basa riba un eror, pa duna apoyo pa coregi esaki.

E carta tabata firma pa representantenan di SZA (Hospital), ImSan, ASHA, VMSA, HAVA, FSMA Respaldo, AVF, VVA, ADS, ABV, BVA y Laboratorio di Servicio. Copia bay pa Gobernador di Aruba, secretario di estado R. Knops, Comision di Staten Aruba pa Salubridad Publico, ministro encarga cu Salubridad Publico Aruba, CAft, y AZV.