Maestra di primaria Elena Cuetara, kende tabatin 25 aña como director di un scol, a perde trabou pa publica riba e red social un video den cual tabata imita e cantante Mexicano, Paulina Rubio.
Riba e video unda e ta imita e cantante, Cuetara ta haci un tono di voz cu accent Spaño, ta aparece cu cabey busha, cu makiyahe mancha y recomendando consumo di alcohol.
E video tin mas di 600 comentario y a ser comparti tanto biaha cu el a yega te na e mayornan di alumnonan di e scol, di cual no ta menciona e nomber, kendenan a considera cu actitud di e directora no tabata adecua y tabata duna mal ehempel na nan yiu, pa loke a pidi su destitucion.
“Dia 27 di mei, den pleno cuarentena, mi a haya idea di haci un video imitando Paulina Rubio den mal estado. Un siman despues mi ta haya un yamada di mi hefe informando cu tin un grupo di mayor hopi molesto pasobra nan ta kere cu mi ta dunando un mensahe inadecua. Y a bisa mi cu nos no por sigui traha hunto”, Elena a conta.
Sinembargo, el a sigura cu el a keda den bon termino cu su ex- dunado di trabou y cu otro parti di mayornan di alumnonan, kende a comenta cu si tabata sa cu tur cos tabata un chansa. “Mi ta pensando ki pa haci cu mi bida awo. Pero si mi ta kere cu mayornan mester pensa cu maestronan tambe ta persona. Tambe tin derecho di diberti, di haci chansa”, el a insisti. “Tur cos tabata un chansa.”
Lo cierto ta cu Paulina Rubio no ta pasando den bon momento ultimo lunanan. Na april memey di pandemia el a ricibi critica pa ofrece un mensahe riba TikTok den cual e tabata luci den mal estado. Durante e transmision su comportamento tabata eratico y su incapacidad pa corda letra di su canticanan a haci cu hopi fanatico a laga comentario negativo riba rednan social. E tabata confundi e palabranan, y tabatin problema pa bisa ‘coronavirus’.
