Despues di algun dia cu Hospital Dr. Horacio Oduber a sufri un incidente di candela cu a causa hopi problema pa hospital, minister di Salud Dangui Oduber a duna di conoce cu diaranson ultimo a entrega e area back pa hospital y saneamento a tuma luga.
Tambe Oduber a informa cu a haci e midimento pa check si tin asbest den aire y a conclui cu no a keda asbest na e momentonan aki den ningun area di hospital.
Ademas, el a señala cu e mudamento a cuminsa ayera y lo dura aproximadamente tres dia. Diadomingo awor nan lo yega na capacidad cu hospital tabatin prome cu e candela. E capacidad di cama adicional, cu tabata percura pa tin na momento cu COVID-19 a yega Aruba tabata 6 cama so den ICU; esaki lo aumenta na 33 si ta necesario, pero pa haci esaki falta personal.
Di esaki, el a menciona cu ya caba Hulanda a bisa cu na momento cu Aruba lo sinti e necesidad cu mester di extra personal pa ICU, por haci e peticion pa Aruba expande e personal te cu 35.
Tocante habrimento di frontera cu pa fin di siman aki, cu Aruba Airport Authority a anuncia cu ta spera di procesa e yegada di 40 avion y aproximadamente 4.000 turista, minister Oduber a considera cu pa loke ta trata Merca, nan a tuma un decision hopi responsabel, cu tur e medidanan di prevencion cu a wordo tuma y teniendo na cuenta cu hospital ta back diadomingo awor, nan ta sinti responsabel pa por habri frontera.
