Sindicato di Polis Aruba (SPA) ta haya hopi lamentabel cu 11 parlamentario a dicidi aproba e ley di reduccion di salario di empleado publico.
Presidente di SPA, Jose Dirksz a declara na Bon Dia Aruba cu aprobacion di e ley aki lo tin consecuencianan hopi drastico, no solamente pa polis, sino pa 7 mil ambtenaarnan. Tanto asina cu lo yega un momento cu no lo ta atractivo mas pa bo ta ambtenaar na Aruba.
Un articulo di e ley cu SPA ta considera cu lo tin su impacto pa empleadonan publico ta articulo 7. E ta haya cu e hecho cu e ley aki a wordo aproba sin bin cu cambio riba articulo 7, parlamento ta duna gobierno e poder pa ora cu e ta haya cu ta bon, e ta “djis sigui corta den nan salario, sin bay parlamento.”
Tambe el a menciona e articulo 8 cu ta papia di tot nader orde ta haci cu nan situacion di empleadonan publico ta bira pio. SPA ta lamenta cu a pesar cu nan a vocifera, hunto cu otro sindicatonan, nan preocupacion riba specificamente e tipo di articulonan di e ley aki, ‘nos flamante parlamentarionan a bay door’, segun presidente di SPA. Awor nan tin cu e dolor aki.
El a trece dilanti cu e dia cu nan a tene un marcha pa entrega un carta na Parlamento, nan a laga nos organo legislativo sa cu ta bay tin un degradacion pisa den e pension di empleadonan publico.
Nan ta den un incertidumbre, ya cu nan no sa aki un aña kico ta bay resta di nan salario. Ya cu e aprobacion di e ley aki ta duna apoderacion pa gobierno lo por sigui corta.
