E conflicto cu Reino y Hulanda a tuma un rumbo mahos na luga cu nos a drenta den awa mas calma. Parlamento tambe ta desea di bisa un ke otro tocante e asunto. No cu esey ta bay cambia tanto, pasobra e lider a duna su palabra caba na Den Haag, y den tempo record, cu no ta bay bringa e nombramento. Pero aparte di esey, nos a ripara otro aspecto cu no a haya tanto atencion, y esey ta e situacion fastioso pa e candidato cu gobierno a trece dilanti, nos actual ministro di Financia.
Mientras cu tur e atencion tabata bay riba e hecho cu gobierno tabata haci su posibel pa e ministro bira Gobernador, no a toca e pregunta pakico e lo mester a bay, como e ministro cu e cartera mas dificil, cu no tabata haciendo mal trabao. E por mustra cu e situacion financiero no a cuminsa drecha ainda ora ta papia di debe acumula, pero cu algun creatividad ta cumpliendo riba papel cu e normanan pa deficit rumbo pa un surplus di 0,5% di GDP na 2018. En todo caso a para e sangramento grandi e añanan anterior unda e debe publico tabata subi cu centenares di miyon di florin pa aña y a cuminsa restructura y mehora operacion tecnico, cu bista riba un aprobacion di accountant aki algun aña.
Cu esey ainda no a logra drecha structuralmente e sistema financiero. Algun gasto grandi ta keda ocupa demasiado di e espacio financiero disponibel; specialmente gasto di personal y gasto di interes ta limita e posibilidadnan pa uza placa pa otro necesidad existente. Otro interogante ta con pa garantisa suficiente crecemento economico den e proximo añanan pa por keda cu un surplus aña tras aña, pa asina hiba nos debe publico di practicamente 85 – 86% na fin di e aña aki, na un nivel sigur di 40% di GDP. Esey lo ta un caminda largo cu ta hiba nos facilmente te casi 2030, prome cu nos tin tera firme bao nos pianan atrobe.
Pa haci esey posibel, mester haci mas cu djis corta un tiki aki, corta un tiki aya, pa despues ripara cu e gastonan, manera un spons ta tuma nan forma y volumen bieu atrobe. E ministro di Financia, cu ta responsabel tambe pa Recurso Humano, a mustra cu e ta consciente di e problemanan structural, cu ta rekeri un strategia mas amplio basa riba cambionan mas profundo.
El a bin tambe cu varios proposicion cu realmente nunca a haya un discusion al caso, salvo e presentacionnan cu e ministro a haci hunto cu e experto Hulandes Willem Vermeend na varios partnernan, cu a haya un recepcion moderadamente positivo. No tabata trata solamente di introduccion di un sistema nobo no cumulativo pa reemplasa BBO/BAZV y integracion di gran parti di impuesto di importacion, pero tambe di deshaci di varios tipo di impuesto di menor importancia, cu tabata mas un molester cu un beneficio, pa gobierno y pa sector priva.
Nos sa kico a sucede cu tur e plannan aki, inclusivo esun di integra wegenbelasting den prijs di combustibel: consideracionnan meramente politico a haci cu no por a ni discuti e asuntonan aki manera nan tabata merece. Tambe riba tereno di restructura e aparato publico te awor no a logra tanto, no pa falta di boluntad di banda di e ministro encarga, pero si di banda di su coleganan. Sin nan consentimento ta imposibel pa yega na ‘streamline’ e aparato.
Pero en todo caso, talbes involuntariamente, e ta mustrando nan un spiel, y grandi: e ta e unico ministro cu no tin mas cu un man yen (7) di coordinador/asesor, mientras cu tur e otro ministronan mester di manager pa por coordina y maneha nan ‘dream team’ cu ta varia di algun dozijn te riba 120 di nos Prome Ministro. Loke mester lanta e pregunta aki: ta casualidad cu e ministro cu tin tanto responsabilidad y ta ‘perform’ contra biento y marea, ta esun cu menos hende tin ta cana rond na su despacho? Of por ta cu, pasobra e no ta un politico tipico, e no mester di e parti di campañado, cu t’ey pa cierto trabao di reclutacion pero no pa nan contenido intelectual? Esey ta significa anto cu nos ta pagando mas di 3o miyon pa aña, no pa pone gobernacion core miho pero mas bien pa yuda garantisa e siguiente victoria electoral? No ta esey nan ta yama ‘patronahe politico?’
Pa bolbe riba e posicion di ministro di Financia: kico lo tabata e plan si e miho performer di e team, unda ademas no tin limite di edad, lo a bay pa e otro puesto (gobernador)? Esey lo a habri caminda pa pone un persona cu lo ta mas generoso cu su coleganan, manera e ministro den e gabinete 2009 – 2013, cu a habri man laga tur cos bay, y realmente a pone nos unda nos ta awe cu nos debe gigantesco? Si nos ministro di Financia a bira gobernador, di e banda aki lo no tabatin critica. Pero si lo a cuestiona ta den man di ken Financia lo a bay cay!
