Richinel Danies, kende por remarca como un di e pioneronan di e lucha contra abuso di mucha den ultimo añanan, mescos cu Lisette Gomes, desde diabierna ta deteni pa menasa contra polis, segun vocero di OM. E lo sinta cu fiscal awe. A detene durante e protesta ‘sit-in’, cual tabata despues di e protesta di grupo ‘Ta basta’ diabierna ultimo.

E grupo di ciudadano cu a dicidi protesta hunto cu Danies tabata mas chikito, compara cu e manifestacion grandi cu e grupo ‘Ta basta’ a organisa. Den combersacion cu varios persona cu a bay e marcha di ‘Ta basta’, unda a presenta un cantidad di punto dilanti parlamento y gobierno, a compronde cu no tabata duidelijk pa hopi persona cu lo tin dos grupo, of dos protesta apart, enfoca riba e tema di abuso di mucha.

Sinembargo tabatin un par di diferencia cardinal entre e dos protestanan, e prome di cual ta encera e manera di protesta, e di dos, e temanan pakico ta protesta, pero tambe cu no a entrega ningun manifesto of sinta cu gobernante. E di dos protesta, cual Danies a yama, a encera cu un grupo di persona a sinta dilanti edificio di parlamento riba L.G. Smith Boulevard. Nan a sinta mas o menos desde 6 or di atardi diabierna ultimo te 10 or di anochi. E manifestacion tabata uno pacifico y tabatin famianan cu a sinta hunto cu nan mucha sea riba e caya mes of na e stupi.

E tema di e protesta, apart di expresa malcontento cu con e sistema pa combati abuso di mucha, y cadena hudicial den su totalidad ta fayando, tabata pa expresa cu e problemanan sistematico aki ta envolvi intimamente cu corupcion. Den combersacion cu Danies na comienso di e protesta ‘sit-in’, e ta menciona cu el combersa cu ex-Procurador General Alexander Van Dam, y e ex-PG a splik’e cu “e tata di Evelyn (Prome Minister) tin nos pega, ful Aruba, cu ful nos sistema. Desde di e dia cu Betico Croes a muri, el a lanta su comision pa tur gobierno bin traha cu fundacion. Anto esey tin nos sistema kibra, cu hasta pa caso di abuso di mucha nan no por kere nos sistema. El a bisa mi pa pone tur hende riba caya pa nos por yega kibra e sistema pa por haya algo cu ta cana.”

Danies a haci un yamado pa caba cu corupcion y abuso di mucha pasobra e ta mira, conforme tambe loke e lo a tende di Van Dam, “cu tur gobierno ta traha cu fundacion, y tur ta corupto.” Van Dam den su temporada como PG a introduci un par di reforma den e cadena hudicial, entre otro instruccionnan pa polis unda ta indica cu mester meld violencia domestico, y institucion di e Veiligheidshuis. Danies a critica e manifestacion di Jeffrey Schuilenburg riba e mesun dia, pasobra “cualkier PG cu sinta tin cu traha cu e mesun sistema, y e sistema ta loke tin tur cos tranca. Nos a wordo lanta cu ta e sistema ey nos tin cu biba cune, anto niun hende no a rabia cune. Un hende tin cu lanta contra dje.”

Danies a sigui bisa cu su bida lo ta den peliger, pasobra “mi sa cuanto cos sushi tin. P’esey ami no por bay cas. Mi a wordo instrui con Poentje Castro a muri. Poentje a sinta cu OM pa djey bay muri. Esaki ta cos serio.”

Informacion incorecto di KPA
 Despues di e detencionnan, KPA a manda un comunicado cual nos medio a publica den edicion di ayera, sinembargo tin algun informacion cu KPA a manda cu no ta cuadra cu realidad. Den e comunicado ta indica cu e protesta ‘sit-in’ tabatin te 10 or di anochi pa por sinta riba Boulevard, cual no ta klop. E grupo en cuestion no a pidi un permiso pa nan manifesta ni a ricibi e informacion cu tabatin te 10 or pa manifesta. E grupo cu a pidi permiso, tabata ‘Ta Basta’, cual tabatin permiso bou nomber di Yuri Bracho, di kende e grupo a tuma distancia. Di un momento pa otro ora e grupo tabata sigui nan protesta pacifico polisnan a anuncia den bos duro cu ‘esaki ta prome waarschuwing, baha di caminda’ y a cuminsa actua cu man duro, sin anuncio previo.

Pakico sit-in
Durante e protesta a papia cu Beach Delamare, kende a expresa cu ‘tur hende tin e derecho pa protesta civico conforme articulo 20 di e declaracion universal di derechonan humano di Nacionnan Uni ora bo ta sinti cu tin cosnan cu ta pasando den bo comunidad cu cual bo no ta di acuerdo’. Esaki lo ta un di e rasonnan dicon no a pidi pa un permiso pa protesta.

Delamare a sigui splica cu a dicidi pa protesta di e manera aki, sinta, pasobra “pasobra tur hende ta marcha, tur hende ta cana, tur hende ta grita, y nada no ta pasa. A ripara cu si bo tuma bo tempo pa sinta civicamente hopi mas cos ta pasa en bes cu bo bay sinta bula, kibra, etc. Hopi hende, vooral na Aruba, no conoce un protesta pacifico di tal indole. Ta bin, ta entrega manifesto, pa djey core bay cas of core bay bar bay bebe. Esey ta bay haci, no ta tuma tempo pa sinta y protesta pasobra nan tin e derecho di protesta, pasobra nan no ta custuma cu esey. Esaki ta prome biaha cu mi ta haci un sit-in aki na Aruba. Djis mester yega, sinta, that’s it.” Delamare a sigui splica cu a scoge pa e protesta aki pasobra “ya a entrega hopi manifesto, a colecta firma varios biaha, y esey no a yega na niun cambio”.

Potretnan cortesia di portal 24ora.com.