Mediconan contra ‘eigen bijdrage’ cerca specialista Alternativa: Eigen bijdrage na Spoedeisende Hulp

Den un carta dirigi na Staten y na ministro encarga cu salud publico, diferente organisacion den salud publico a expresa nan obhecion contra e medida anuncia pa gobierno di un ‘eigen bijdrage’ cu cada pacient lo mester paga na momento di bishita un medico specialista.

E firmantenan, representando HAVA, ASHA, VMSA, Raad van Bestuur di Hospital, ImSan y Raad van Bestuur di Respaldo, ta bisa di ta comprende e urgencia pa gobierno corta den gasto medico, sin embargo nan ta haya cu e medida aki lo tin un impacto negativo riba salud en general, loke lo aumenta gasto medico despues y lo limita acceso na cuido medico.

Como contrapropuesta ta sugeri pa pone un ‘eigen bijdrage’ pa limita bishita innecesario na seccion di ‘Spoedeisende Hulp’ na Hospital. Esaki segun e firmantenan lo percura pa limita costo a corto plazo caba y tambe lo tin efecto riba mehoracion di acceso y calidad di cuido.

Argumentando mas den detaye, ta bisa cu contribucion propio den cuido medico tin dos meta, mas tanto combina, cual ta frena uso innecesario di e asegurado individual cu ta dicidi di no haci uso di e cuido, y ademas ta manda e gasto di e asegurador pa e usuario, di tal manera cu mester di menos recurso colectivo pa financia cuido.

Segun e firmantenan, no ta bay logra ningun di e dos metanan. Ta referi por ehemplo na e caso di un consulta cu un specialista, unda ya caba un medico (di cas o di Emergencia) a evalua e caso y ta hay cu mester di atencion di specialista. Purba di frena e bishita na specialista ta trece e riesgo cune cu un persona no ta bay specialista, y den un fase mas laat, ora su situacion a bira hopi mas serio, ta termina den hospital, cu gastonan grandi relaciona cu esey. Ta duna e ehemplo di un pacient cu tin pulmonia pero no ta bay cerca e specialista, pero despues ta trece gasto extra pa e sistema di seguro medico ora mester hospitalisa e persona.

Ademas ta trece dilanti cu e despachonan di e specialistanan no ta dispone di caha, aparato pa POS, y personal pa atende caha y hiba administracion. Tur esaki lo mester cumpra y instala y mester emplea y train personal pa maneha esaki. Tambe ta señala cu den e crisis actual tin hopi hende cu no lo por paga e contribucion aki, cu ta core riesgo di no continua nan tratamento, cu e consecuencia cu esaki lo tin despues pa nan salud y cu ta causa gasto mas grandi despues. Ta duna e ehemplo di un pacient di riñon cu no ta bay specialista y cu ta termina dado momento como pacient di dialyse.

E instancianan firmante ta ilustra nan proposicion cu cifra. Di investigacion na Seccion di Emergencia di Hospital ta resulta cu por lo menos 21%, supuestamente 30% y posiblemente hasta 40% di e consultanan cu ta tuma lugar ey, por a tuma lugar cerca e docter di cas. E docter di cas segun e firmantenan ta bon accesible na su consulta o via e ‘huisartsenpost’. Pa mayor facilidad hende ta scoge pa bay Spoedeisende Hulp cu ta directamente accesible, ta habri 24/7 y cu ta duna posible acceso (innecesario) na un specialista. Esaki tin como consecuencia cu ta mina e papel di e docter di cas como ‘poortwachter’ mientras cu den e sistema di cuido di Aruba e medico di cas tin e funcion central. Tambe esaki lo ta causa hospitalisacion innecesario loke ta causa uso inadecua di recursonan scars y ademas un estorbo pa e hospitalisacion planifica, cu consecuencia pa planificacion di capacidad y procesonan di cuido. Ademas esaki ta stimula uso inncesario di recursonan caro di ayudo di emergencia.

Ta trata aki facilmente di sigur 10.000 bishita na SEH, cu ta costa placa y ta haci mas dificil pa e docter di cas haci su trabao, segun e firmantenan. Ta calcula cu un bishita na seccion di Emergencia na Hospital ta costa minimo Afl. 250. Si cobra un persona, cu haya e conseho pa no haya atencion eynan sino bay cerca su docter di cas, un suma di Afl. 100,- si e ta insisti di haya tratamento na Spoedeisende Hulp, ainda esaki ta menos di mitar di loke e ta costa en realidad. Si evita mitar di e bishitanan innecesario, esaki ta un alivio caba pa tempo di espera y capacidad di ocupacion di hospital. Y e bishitanan cu si ta keda atendi en todo caso ta trece mitar miyon di entrada pa aña pa Hospital. E suma aki ta mas o menos den mesun categoria cu loke lo a gana cu e ‘eigen bijdrage’ den e proposicion actual cu e firmantenan no ta apoya. Ademas, hospital tin e infrastructura caba di pago, pasobra por ehemplo e turistanan ya caba mester por paga inmediatamente pa nan gastonan.

E organisacionnan firmante ta anuncia cu nan a discuti nan alternativa caba cu AZV, cu a expresa di no tin obhecion pa implementa e alternativa aki. Por lo tanto ta haci un yamado na Parlamento y na e ministro encarga pa considera introduccion di e alternativa aki, y no e eigen bijdrage riba bishita cerca specialista.