E aña aki San Nicolas Business Association (SNBA) ta celebra su hubileo di oro.

Presidente actual di SNBA, Andres Hernandez a recorda cu 50 aña pasa e asociacion di comerciante aki a wordo lanta. Pero lamentablemente dor di Covid-19, nan no por a tene un celebracion. Si e situacion actual lo normalisa, SNBA tin pensa di haci algo prome cu fin di aña.

Na luna di december nan tin un idea pa ehecuta den cuadro di e hubileo aki. Nan kier uni e celebracion aki hunto cu un actividad publico social. Pero ainda e plan aki ta keda pa despues.

50 aña di existencia di SNBA a nifica hopi pa comercio di San Nicolas y bisindario. Sr. Hernandez mes kende tin un compania industrial di kimico na San Nicolas, tin 14 aña como miembro di e asociacion. Durante e ultimo 4 aña el a asumi e responsabilidad di bira presidente di SNBA, caminda el a wordo reeligi aña pasa.

Meta

E meta di e asociacion aki inicialmente tabata pa boga riba e parti comercial y industrial pa San Nicolas so. Pero awor despues cu nan a bin cu cambio riba nan statuto, nan a expande pa e sector comercial di pariba di brug for di Balashi bin pariba.

Prome cu Covid, SNBA tabatin alrededor di 120 miembro. Pero cu e crisis aki, Sr. Hernandez a bisa cu awor nan ta bay check cuanto di nan a keda. Ya cu hopi tienda chikito cu tabata miembro di e asociacion aki no a wanta e impacto aki. E ta calcula cu nan lo cay cu un 20% di nan miembresia.

E ta haya cu tin diferente proyecto den plan cu ta biniendo pa San Nicolas y cu ta crea un ambiente positivo di speransa. Un di nan ta e proyecto di renobacion di caya principal di San Nicolas. Pero e pregunta ta: Unda el a keda? E ta haya cu practicamente proyecto aki ta stanca.

Sinembargo pabao tin varios proyecto den fast track cu si ta tumando luga. Sr. Hernandez ta lamenta cu San Nicolas semper ta keda atras. Presidente di SNBA ta kere cu ta yegando e momento cu ta toca nan pa tuma bek un posicion. Practicamente e ta haya cu mester trata di balansa e inversion di e poco placa cu e gobierno tabatin ainda pa inverti den infrastructura.

Aspecto social

Igualmente e asociacion su interes tabata e sector comercial. Pero independientemente cu YMCA t’ey cu nan labor social, e atencion pa atende cu aspecto social ta grandi na San Nicolas y bisindario.

P’esey SNBA a dicidi pa no limita su mes riba e parti comercial so. Sino cu nan ta duna su apoyo y contribucion pa otro tipo di actividad y muy specialmente social. Aworaki nan ta sostene e bunita obra cu YMCA ta bin realisando cu apoyo di CEDE Aruba pa entrega di cuminda cayente gratis pa e personanan di mas necesidad di pariba di brug.

E impacto ta grandi pa e comunidad di pariba di brug cu e crisis Covid. El a laga sa cu e impacto aki ta pa full Aruba tambe, pero San Nicolas ta den un estado cu tabata hopi dificil economicamente prome y awor pio. San Nicolas su actividad ta hopi abao, y Bon Dia Aruba por a constata esaki durante un recorido cu a haci den siman cu ta supone cu tin mas movecion.

Conscientisacion

Un plan importante cu SNBA kier bin cune, for di algun tempo pero cu ainda ta pendiente, ta uno di conscientisacion. Presidente di SNBA ta considera e plan aki clave, ya cu na kier conscientisa henter pueblo di pariba di brug cu ta nan so por mantene e negoshinan di San Nicolas y bisindario na bida. “E ta asina senciyo. Nos no tin turismo, pero nos tin nos mes,” el a bisa.

SNBA ta ripara cu pariba di brug nan comunidad por imagina cu tin mas facilidad den e supermercado grandi. Tambe cu nan haya mas variedad exclusivo cu eventualmente ta haci cu hopi di nan poblacion ta dicidi di bay te pabao di brug pa nan haci nan compras. E ta haya cu e ta un tiki ridiculo pa pensa, pero asina e ta.

Pero banda di esey te hasta pa socialisacion di e mesun habitantenan e situacion aki ta hunga un rol. Actualmente nan tin cinema cu a tene su reapertura. El a trece e ehempel specifico aki, ya cu nan a bin cu prijs special, pero e mesun pueblo no ta reacciona completamente ainda. Pero si ora bo ta bay e cinemanan di pabao, ya caba bo ta wak nan yen.

Sr. Hernandez den nomber di SNBA ta pidi y reitera su solicitud cu e unico forma cu nan por mantene nan negoshi pariba di brug ta cu sosten di nan mesun pueblo. El a bisa cu Covid a dal nos tur y mester reactiva nos economia. E peliger aworaki ta cu nos mester habri necesariamente nos frontera den cierto forma. Como presidente di SBNA, e ta haci un yamado pa nos tur premira cu no ta pa semper gobierno ta bay por drecha e salario di tur hende. Asina ta cu dor di esey, necesidad di habri nos porta pa nos reactiva nos economia na cualkier nivel, ta hopi necesario.

El a agrega cu SNBA semper tabata den malo y den pio, y awor den e crisis cu nos ta pasando aden. “Pero nos t’ey. Semper mi ta pensa cu e asociacion lo te eynan para dilanti di tur loke ta e parti comercial y social di pariba di brug,” el a bisa durante un entrevista cu e matutino aki.