Grupo di Trabou Traficacion Contrabando di Hende, TMMA (Taskforce Mensenhandel-Mensensmokkel) ta lamenta e evaluacion di Departamento di Estado Mericano, cu a duna Aruba un grado Tier 2 Watch List. Ta un caida den evaluacion pa esfuersonan pa bringra traficacion di hende.

Coordinado Nacional Jeannette Richardson Baars a bisa cu e evaluacion no ta locual e grupo di trabou a spera, pero en todo caso ta studia e recomendacionnan y unda ta posibel, implementa esakinan.

“Locual nos a constata si, ta cu tin puntonan cu no ta completo den e rapport,” Richardson Baars a bisa. “Ta puntonan cu mester di cierto nuance. Pasobra por ehempel ta papia di fuentenan cu pa nos no ta conoci, pero cu Departamento di Estado a uza pa sostene su conclusionnan. Mas ainda, no a comparti e fuentenan aki cu autoridadnan Arubiano, cu ta haci imposibel pa verifica e informacionnan.”

Kico ta contrabando di hende vs traficacion di hende

E ta esencial pa compronde e diferencia entre contrabando di hende versus traficacion di hende. Contrabando ta e accion fisico pa transporta un persona den forma ilegal. E ta un infraccion contra ley di inmigracion di un pais. Traficacion di hende ta un infraccion contra derechonan di e persona. Den ambos caso, victimanan no ta esun cu a comete e crimen. Un victima di traficacion di hende ta un esclavo moderno, unda e no por haci uzo di su derechonan, y entre otro ta hay’e forsa pa haci trabounan excesivo sin e pago corespondiente, ta perde su libertad, ta kita nan paspoort di nan, ta retene salario of parti di salario pa cualkier excuus y ta forsa pa tene relacion sexual sea pa produci placa of pa cierto siguridad.

Mas caso contrabando a produci menos caso traficacion

E evaluacion di Aruba ta basa riba e criteria cu na 2019 tabatin menos investigacion riba traficacion di hende, lo a yuda menos victima y cu no a sentencia traficadornan di hende. E Coordinado Nacional ta bisa cu e analisis den e TIP Report 2020 riba e parti aki ta parcialmente coreto, den sentido cu unda cu señala of topa cu victimanan, a atende cu e casonan, hasta sin un persecucion penal. Sinembargo mirando e aumento grandi di migrante for di Venezuela, e enfoke di autoridadnan na Aruba pa persecucion penal tabata mas riba contrabando di hende y no tanto e traficacion di persona. “Nos a purba para e transporte ilegal di hende, y detene y persigui e contrabandistanan.” Richardson Baars a bisa cu di e forma aki a evita cu e victimanan di contrabando a bira victimanan di traficacion di hende. Nos ta convenci cu si para contrabando di hende por evita cu hende ta bira victima di abuso.” E Coordinado di TMMA a bisa cu Departamento di Estado no a tene cuenta cu e aspecto aki den su evaluacion.

E Unidad Mensenhandel-Menselsmokkel ta un team investigativo cu ta consisti di Cuerpo Policial y Koninklijke Marachaussee, y na 2019 a investiga un total di 12 caso di contrabando di hende. Tabatin 10 sentencia cu castigonan di prison entre ocho (8) pa 48 luna di prison. A investiga dos (2) caso di posibel traficacion di hende pero cu no a conduci na un persecucion penal. Den cuadro di derecho administrativo, a logra impone boetnan riba dunado di trabou, cu tambe tin un efecto pa stroba e traficadornan di hende. Ora di evalua Aruba pa e TIP report sinembargo, ta uza un criteria hopi limita, y no ta inclui completamente e investigacion y condena di contrabando di hende.

CMMA

TMMA cu ta e organo di conseho y maneho di Gobierno riba e tereno di traficacion y contrabando di hende, a cuminza na 2019 cu e desaroyo di e Centro di Coordinacion Traficacion y Contrabando di hende, CMMA ( Coordinatiecentrum Mensenhandel-Mensensmokkel Aruba). CMMA cu ya a cuminza funciona y lo ta completamente operacional pa e aña aki. CMMA lo ta e punto di conexion di informacion riba traficacion y contrabando di hende. Den e cuadro aki, lo traha e resto di aña aki cu e Bureau Central Nacional Combatimento di Terorismo, Siguridad y Interpol, NCTVI ( Nationaal Centraal bureau Terrorismebestrijding, Veiligheid en Interpol) pa yega na un banco di data pa registracion y analisis di informacion riba e terenonan di traficacion y contrabando di hende. Di e forma aki CMMA lo por coordina y planea e accionnan multidisciplinario, cu ta lo bira mas efectivo.

e expectativa ta cu ademas lo tin mas informacion disponibel pa investiga e fenomeno di traficacion di hende.

Banda di esey, entre otro pa medio di financiamento for di e fondo cu Hulanda a pone disponibel pa e crisis di migrantenan for di Venezuela, lo desaroya mas iniciativa pa un miho forma pa asisti y guia victimanan di traficacion di hende. Lo renoba e campaña di conscientisacion popular “Habri bo Wowo” unda lo tin mas atencion pa traficacion y contrabando di hende, y tambe asilo. “E ta crucial pa nos haya e informacion for di e victimanan y esnan den comunidad. Nos no sa unda e casonan ta, y nos no por ni infiltra sin mas, si no tin indicacion. P’esey mes ta esencial cu comunidad duna nos informacion ora tin sospecho di traficacion di hende,” Jeannette Richardson Baars a enfatisa.

Aruba tambe lo enfoca e aña aki (sigui) traha cu partnernan local, regional y internacional pa combati traficacion y contrabando di hende. Di e forma aki, lo sigui e puntonan di atencion cu TIP Report 2020 como guia pa mehoracion di resultadonan di Aruba.