Ayera nos espacio aereo a keda habri pa ricibi e vuelonan cu ta bini for di Europa, Canada y Caribe, cu excepcion di Republica Dominicana y Haiti. Sinembargo ainda e reapertura cu Merca programa pa dia 10 di juli ta den evaluacion pa bin cu un decision final.
E decision aki lo tin di haci eventualmente pa extende e fecha aki. Of defini e estadonan di Merca cu nos ta ricibi bishitantenan for di nan. Ayera nochi gobierno a keda di duna mas informacion riba e decision final pa loke ta trata nos principal mercado turistico. E prome mandatario a bisa cu ainda nan ta evaluando si nan lo permiti e fluho di hendenan entre Merca y Aruba. Kiermen e decision aki no a cay ainda. Sinembargo el a bisa cu e no ta bayendo manera nan a pensa inicialmente, mirando e situacion di e virus na Merca. Nan ta sigui monitor e desaroyo den diferente estado Mericano pa asina evalua y tuma e miho decision pa Aruba.
Minister Presidente Evelyn Wever-Croes a declara na Bon Dia Aruba cu expectativa tabata grandi cu e reapertura di nos espacio aereo pa Canada, Europa y Caribe cu cierto excepcion menciona ariba. Pero el a aclaria cu no mesora Aruba ta bin haya un cantidad grandi di avion. Aunke e vuelonan ta cuminsa entrante ayera 1 di juli, por ehempel pa Canada su prome vuelo ta yega Aruba dia 18 di juli.
E mandatario a declara na Bon Dia Aruba cu ayera mes e tabatin un reunion importante riba e siguiente paso cu ta e reapertura cu Merca dia 10 di juli. Esta considerando cu e desaroyo na Merca di e Covid ta preocupante, gobierno mester tuma un decision mas responsabel, el a laga sa.
Na momento cu e prome mandatario a duna e declaracion aki ayera mainta, el a bisa cu gobierno tabatin un conseho riba mesa pa laga cierto estado di Merca su bishitantenan bin Aruba, pero otro estadonan no manera estado di Florida. Of nan mester bin cu extra exigencianan. Pues cualkier decision cu a cay den e dilema cu Merca, mester garantisa cu e ta sigur pa Aruba, el a bisa.
El a bisa cu Aruba tin full reglanan di control y protocol implementa den nos terminal aereo, y nos mester sinti nos mes mas trankil. Tambe nan lo bin cu e posibilidad cu unabes cu e turista ta na Aruba, y e ta sinti un sintoma, cu e por haci test mesora. Ademas e testnan exigi ora cu un bishitante ta drenta Aruba, lo permiti cu por descubri e virus mesora y isol’e.
Por lo menos awor cu nos a cuminsa habri nos frontera gradualmente –segun e mandatario- Aruba por cuminsa ricibi su bishitantenan di un forma mas controla. E ta haya bon cu nan a dicidi di hacie gradualmente y no di golpi, ya cu asina nos por test tur protocol y sistemanan cu a wordo implementa. Esaki prome cu nos por bisa cu Aruba ta cla completamente pa ricibi masalmente nos bishitantenan di otro paisnan.
E prome mandatario ta haya bon cu nan a bin cu un reapertura gradualmente, pasobra si den caso e proceso no ta bay bon pa cualkier motibo, nan por frena esaki na tempo sin haci mucho daño.
