Problema di ilegalidad… No ta bay via negligencia…

E discusion cu e ultimo exigencia di Hulanda, pa obliga Aruba cambia di su propio ley di supervision pa esun cu ta vigente pa e dos otro islanan cu ta pais den Reino, no ta trece solamente hopi emocioncune. E por kita atencion di otro aspecto di nos actual situacion cu mester di nos atencion.

Un di e puntonan mas importante ta e pregunta kico nos ta bay haci cu e grupo grandi di persona sin status legal na nos pais. Den e edicIon aki por lesa e relato di un persona cu a bin Aruba di su pais Venezuela, pensando cu esey lo por tabata un solucion pa e situacion den cual e tabata biba aya. Mescos cu e persona aki, mas di cinco miyon hende a bandona e pais bisiña den ultimo añanan en busca di un mihor futuro na otro pais. E cinco miyon ey a plama riba henter nos continente y mas leu. Den esey nos como bisiña, chikito, no ta excepcion banda di e otro paisnan di nos continente. Sin embargo, nos tin nos problemanan particular; por ehemplo, cu nos ta asina chikito. Esey ta haci cu rapidamente nos ta yega na un corelacion halto di refugiado/indocumentado pa cada 100.000 habitante, compara cu un pais grandi cu tin hopi mas refugiado pa atende, manera Colombia. Pero, relativamente nos problema ta mustra mas grandi. Un par di cifra: Colombia tin actualmente alrededor di 50 miyon habitante, y un grupo di casi 1,8 miyon Venezolano na e pais, den diferente condicion. Un grupo di mas di 700.000 tin un permiso di residencia regla, mientras cu un gran parti, practicamente un miyon, no tin esey. Si nos limita nos na esnan indocumenta, por bisa cu Colombia tin 1 Venezolano riba cada 50 habitante, o sea 2.000 pa cada 100.000 habitante…

Na Aruba nos no sa cuanto persona di Venezuela tin actualmente aki. A yega di menciona cifra di 15.000 o hasta mas, pero no tin ni sikiera un calculacion publica oficialmente. Esey riba su mes no ta nada straño, pasobra keto bay nos ta pega den e cultura gubernamental di informa publico lo menos posible, den e aparente speranza cu e ora nos no ta preocupa tanto. Enfin, si e cifranan ey ta corecto, anto nos tin un poco mas cu 10.000 Venezolano riba 100.000 habitante…, cinco biaha mas cu Colombia. Naturalmente e comparacion di e forma aki tin su complicacion. Na Colombia e fenomeno visible di e Venezolano pober riba caya ta tur caminda, den tur ciudad, grandi y chikito, y den e region cerca di frontera, no ta di papia mes. Esey tin un motibo. Colombia ta un pais cu ta avanzando economicamente, pero ainda tin un poblacion grandi cu ta mes pober cu e Venezolano cu a huy di su pais. E refugiado ta competi grandemente cu e Colombiano den igual situacion, tanto pa loke ta trabao como vivienda.

Cerca nos tin un situacion diferente. Bo no ta haya hende drumi riba caya pasobra nan no tin caminda di bay. Nos ta un pais chikito, pero hopi mas prospero cu Colombia, o mejor dicho, nos tabata, te ora e crisis di coronavirus a dal nos tambe. Pasobra den e crisis actualtrabao a bira un problema, tanto pa e trahador local como e stranhero cu si tin permiso di estadia, corda pa esun sin papel, cu tambe mester come. Tur areglo cu tin actualmente pa compensa pa empleo perdi, ta conta solamente pa e persona local y esnan cu ta emplea oficialmente. Y e resto? Nan mester biba segun e lema ‘salvese quien pueda’? Ta bira tempo pa nos cuminza atende e problema aki di e forma cu e merece. Claro cu e situacion no ta nada facil. Nos no por repatria hende na e momento aki, ni esnan cu a registra pa esaki, corda e gran mayoria cu no a haci esey. Sin embargo, nos como pais tin responsabilidad, pa tratado internacional. Tanten nan ta den nos teritorio, nan ta nos responsabilidad. Nos ta tende e critica caba di hende cu ta bisa: “Pero nos no tin ni pa nos mes, corda pa mantene nan tambe…” Esey ta berdad, pero esaki ta e tipo di berdad cu bo ta haya ora bo ta laga hende drenta y nunca ta haci un esfuerzo pa haya nan y manda nan di unda nan ta bin. Nos tin varios decada den e problema aki y nunca a percura pa un solucion, y awor nos mester para pa e consecuencianan. Si nan no por sali, nan mester por come segun norma decente cu nos ta considera apto pa nos pais. Ora nan bira malo nan mester por haya tratamento medico, y no ta laga nan muri riba caya. E gastonan? Pa nos gobierno paga. Nan tin yiu? Nan mester bay scol, tambe segun tratado. Y no manera cierto scolnan tabata pretende, cu nan ta bonbini solamente si nan tin status legal. Tur esaki ta cay nos pisa? Nos no por paga tur esaki? Nos no ta nos so den e cos aki; nos ta den Reino Hulandes. E frontera cu Venezuela no ta di nos, e ta di Reino. Pero nos tabatin tarea den esaki, cu nos a neglisha pa decadas. Ban traha awor.