Ayera tardi un biaha mas Sindicato di Maestro Aruba (SIMAR) a organisa un marcha pa entrega un carta na gobierno y otro na Parlamento, caminda nan ta condena e maneho di minister Rudy Lampe riba tereno di enseñansa. E tabata un marcha pacifico caminda nan a purba di tene cuenta distanciamento social, mirando cu dos caso nobo a wordo conoci ayera.
E biaha aki vice prome minister, Andin Bikker a ricibi e carta entrega pa presidente di SIMAR, Josephine Albertus. Tambe e mesun carta aki a wordo entrega na presidente di Parlamento, Juan Thijsen den presencia di otro parlamentarionan, tanto di e coalicion di gobierno, y tambe di oposicion.
Minister Bikker no a duna un opinion riba e carta, ya cu un peticion el a haya di prome minister Wever-Croes pa e tuma e carta den nomber di gobierno, ya cu e tabatin un compromiso pa atende. Mientras cu Sr. Thijsen a bisa cu Parlamento semper ta habri pa e maestronan trece nan preocupacion y respetando nan derecho pa manifesta.
Albertus a amplia riba e carta skirbi na Hulandes, caminda el a remarca cu e confiansa di e maestro y di tur cu ta traha den veld di enseñansa no t’ey mas. A pesar cu nan a purba dialoga y nan a yega di entrega varios carta pa expresa nan preocupacion, pero nan no a wordo honra. SIMAR ta considera esaki como un falta di respet.
El a laga sa cu e unico cos cu SIMAR kier ta pa bin cu trankilidad den enseñansa. Ya cu pa basta tempo nan ta bibando cu hopi disgusto y frustracion y nan no ta wak cu lo por tin un fin. “E motibo principal ta cu no tin confiansa,” el a bisa. Nan ta sinti cu hopi cos ta wordo bisa cerca e maestronan, pero no ta wordo honra. Ni sikiera esun cu prome minister a yega di haci riba para cualkier cambio den enseñansa pa un periodo.
Nan ta pidi pa gobierno nombra un minister cu si tin enseñansa na pecho. Pero tambe un minister cu si por scucha e maestronan y e veld di enseñansa completo.
