Ayera den oranan di mainta, un grupo di ciudadanonan a manifesta nan mal contento na Besturkantor y entrega un manifiesto pa loke ta trata e maneho di e programa FASE, subsidio di salario y ZZP. Algun di nan a manifesta cu no a haya ningun ayudo den e tres luna aki desde cu crisis di Covid-19 a cuminsa.

Maria Bislik, persona cu tabata representa e grupo, a splica cu varios persona tin te hasta 3 luna cu te ainda no a cobra placa pa loke ta trata e programa FASE. E prome punto cu nan a pone riba e manifiesto cu nan a entrega pa minister presidente Evelyn Wever-Croes, minister di Asuntonan Social y Labor Glenbert Croes, y minister di Finanzas y Asuntonan Economico, Xiomara Maduro ta e hecho cu personal di FASE ta keda pidi papelnan pa solicitantenan di e programa, pero te ainda nan no sa kico a pasa cu nan placa. Segun Bislik mes a bisa, ‘esaki no ta un limosna sino un derecho’.

Di mesun manera, el a trece dilanti cu hopi hende a perde nan cas, apartamento, Elmar y Web a corta nan servicio di awa na cas. “Hopi palabranan bunita pero nos kier solucion.” Tambe el a menciona cu si mas medidanan ta bin, e tin miedo pa Aruba bira e segundo Corsou.

Un di e manifestante di fam Charris a expresa cu e tabata traha na un negoshi di paña y dia 27 di februari e doño di e luga a laga nan sin trabou y sin paga nan salario. For di momento cu el a aplica pa FASE, te ainda e no a haya su prome pago y e ta espera cu den dianan aki minister di Labor y Asuntonan Social por yuda den e situacion aki.

El a duna di conoce cu den lunanan aki cu e no a haya entrada, e ta sobreviviendo pa via di su amigonan. E doño di e apartamento na unda e ta biba a dun’e un chens pa e por paga na momento cu e haya su placa.

Otro di e casonan cu a bin dilanti ta di otro manifestante cu a perde su trabou. E prome luna el a haya e prome pago di FASE, per, despues e no a haya ayudo mas, pa motibo cu su number di peticion a wordo manda pa subsidio di salario. E dunado di trabou no a para responsabel mas, pa loke el a manifesta cu esaki a causa un confusion grandi.

Minister Glenbert Croes a expresa: “E placa di FASE t’ey”, y cu su meta ta pa soluciona e problemanan. Di su banda el a admiti cu ta existi fout den e programa y su empeño ta pa coregi tur esey. Asina mes el a haya un lista cu nomber, telefon, cedula y numbernan di peticion di e personanan aki, pa asina segun e minister mes a sigura, nan por haya un solucion lihe. “Pero esaki ta bay ta un siman doloroso pa Aruba.”

Prome minister Evelyn Wever-Croes a bisa cu lo sinta hunto cu departamento di Asuntonan Social pa asina atende cu nan peticion. Di mesun manera el a bisa cu Aruba tin hopi reto y hopi cosnan cu mester wordo soluciona, cu 37.000 persona lo perde of a perde caba nan trabou y cu nan no tabata prepara pa esey.

Minister di Finanzas y Asuntonan Economico, Xiomara Maduro a expresa cu e crisis aki ta uno sin precedente, cu hopi presion y cu den tur esey nan a purba pa yuda lo mas cu ta posibel.

Di mesun manera, Bon Dia Aruba tabata e unico medio di comunicacion cu a compaña e manifestantenan cu a entrega e mesun manifiesto pa Director di Labor y Investigacion, Franklin Kock. El a informa cu na e momentonan aki, pa via di normanan di distanciamento social, e sala di Departamento di Labor ta limita y nan no por atende hopi hende. Door di esey nan a scoge pa solicitantenan por pidi un cita via e-mail y asina atende e personanan y nan caso.

Maria Bislik, representante di e grupo, a menciona na Kock cu nan lo kier sa kico ta pasando, pa motibo cu e personanan cu no a ricibi ayudo ta wordo frustra, pa via cu nan no ta wordo atendi debidamente.

Asina mes, durante e mesun recorido e personanan aki a bishita tambe e oficinanan di SVb, pa motibo cu nan a entrega e mesun manifiesto pa Edwin Jacobs, director di SVb. Jacobs a contesta cu SVb tin e compromiso den temporada aki, nan ta haciendo nan best pa e placa por yega cerca tur hende cu mester di dje, asina como tambe cu nan ta consciente di abusonan cu ta tumando luga.