Bastante atencion tin ta bay ultimo dianan na e sumanan considerable cu turistanan lo mester paga pa nan por hospeda na Aruba, pa motibo di e placa cu mester paga pa e medidanan cu gobierno mester tuma pa garantisa cu turista sin Covid-19 tin un estadia sin problema, y di otro banda esnan cu si ta contagia ta keda trata di un manera corecto.

Tocante e componente di seguro cu turista mester paga pa cubri e riesgo di haya Covid-19 y e gastonan envolvi cu cuarentena obligatorio, isolacion y posible hospitalisacion a aparece hopi reaccion riba pagina di Facebook di Aruba Today, di potencial turista cu kier bin Aruba, di cual nos a haci mencion recientemente. E gastonan halto envolvi cu esey caba ta un obstaculo pa hopi hende pa nan dicidi bin Aruba.

Pero awor ta bira tempo pa tira vista riba e costo di un test (obligatorio) na aeropuerto. E prijs ta bay ta $75, cu ta pone extra peso riba e consumidor (turista). Realmente test di Covid-19 na aeropuerto mester costa asina hopi? Redaccion di Bon Dia Aruba a bay averigua y a consulta cu algun persona conocedor di e materia cu a informa nos cu e test cu segun nan ta bay usa, no por ta costa mas cu $8-$9. Tin test mas caro y mas rapido, pero no ta esey ta bay usa. Naturalmente ta bin e gastonan acerca di atende e pasaheronan y despues procesa e testnan. Pero esaki no por ta mas cu en total Afl. 35 – Afl. 40, ban bisa cu e ta Afl. 50 mes. Pues pakico $75, cu ta alrededor di Afl. 135?

Tur esaki ta haci cu nos ta haya cu ta bira tempo pa duna claridad den e asunto aki. Y p’esey tin diferente pregunta:

  • Tabatin destaho segun regla den e asunto aki? Al fin y al cabo, ta un asunto di miyones, hasta si nos haya un parti di e turistanan cu ta bin normalmente aki.
  • Cual ta e compania cu a gana bidding y finalmente ta importa e testnan y cuanto nan ta costa, CIF y despues di importacion?
  • Ken ta encarga cu proceso di test y procesa e pruebanan?
  • Cuanto nan gasto di operacion ta pa cada test?

Mester tuma na cuenta cu esaki ta algo di interes general grandi. Si ta cobra inhustamente hopi na turista, loke por ocasiona cu nan no ta bin mas, ta algo cu ta toca nos tur, pasobra ta di esey nos tur ta depende, sigur den e crisis economico aki.