Tin keho riba abuso di prijs di cierto productonan probechando escasez cu tin di nan riba mercado. Esaki a pesar cu a wordo introduci un app cu ta podera e consumidornan pa controla y denuncia e tipo di mal practica comercial aki.
Bon Dia Aruba a canalisa e keho aki cu juridische medewerker di Dienst Huur- en Consumentenzaken, Amanda Maduro, kende a base di e pregunta formula a laga sa cu aunke cu canasta basico ta cay bao asunto di consumido, esaki ta cay bao di Economische Zaken, pues lo mester dirigi e pregunta na nan departamento.
Sinembargo riba website di Economische Zaken y riba rednan social regularmente ta publica e lista di prijs maximo di canasta basico. Ta consehabel pa controla esaki ora haci compras. Si e negoshi no ta cumpli cu esaki, por avisa na Economische Zaken. Nan tin nan team di controladonan cu por acudi na e negoshi y tuma e medidanan necesario pa cu esaki.
Pa tur producto cu no tin prijs maximo a base di canasta basico ta conta mercado liber. Cada compania of bendedo por dicidi na ki prijs ta bende e producto of ofrece su servicio. Ta keda na e consumidor pa dicidi si e ta bay di acuerdo cu e prijs aki of no. Pues ta consehabel pa informa bon prome di prijs rasonabel pa e producto of servicio, compara prijs mas posibel y scoge e miho prijs of combinacion di prijs, calidad y garantia cu ta miho pa su situacion. Esaki ta e poder di e consumidor.
Nan ta sugeri cu pa cualkier pregunta, keho of ayudo necesario relata na derechonan di consumido, tuma contacto cu nos departamento libremente na telefon: 582-9914, manda un e-mail na dhcaruba@gmail.com of haci un cita pa pasa na nos oficina na Wayaca 33.
