E caso of conflicto cu ta drenta mas frecuente na Dienst Huur- en Consumentenzaken, durante e crisis di Covid-19, ta e retraso den pago di huur (huurachterstand). Esaki naturalmente door cu hopi hende ta perde nan trabao y asina tambe nan entrada. Sin cu nan tin e fondonan pa por paga e prijs di huur tur luna.
Bon Dia Aruba a acerca Dienst Huur- en Consumentenzaken cu varios pregunta dirigi na Amanda Maduro kende ta Juridische medewerker di e departamento aki. Un pregunta constante tin di haci con e casonan aki ta wordo atendi pa busca un solucion entre ambos parti. Nan ta conseha e huurdo pa papia cu e propietario y pa yega na un areglo di pago. Ta conseha pa yega na un rebaho di e prijs di huur, te na un cierto fecha of te na momento cu e huurdo haya trabao bek. Esaki por keda na un rebaho of por acorda cu dentro di un cierto periodo ta paga bek e retraso (rebaho) aki, sin cu ta termina e acuerdo di huur. Dienst Huur- en Consumentenzaken ta intermedia y yuda cu esaki si mester tambe, unda ta posibel y necesario.
Durante e crisis di Covid en berdad minister concerni a pidi pa e propietarionan ta flexibel, pero esaki tabata mas un suplica na propietario y no mandatorio of basa ariba un ley. Na Hulanda si Gobierno a yega na un areglo cu e huurverenigingen (verhuurders) pa no saca huurders for di cas durante e lockdown. Esaki lo crea un situacion potencialmente peligroso pa e salud publico, ora cu hendenan ta riba caya y sin hogar pa nan keda safe den dje.
Tambe Hulanda a bin cu un Corona spoedwet a base di cual acuerdonan di huur temporario cu lo continua temporalmente durante e periodo di crisis. Na Aruba no tin e problema aki, como cu e acuerdo di huur no ta termina (eenzijdig door di verhuurder) sin e permiso di Huurcommissie.
Di otro banda, como propietario bo no por saca un hende for di cas zomaar paso e no a paga su huur. Pa e verhuurder por termina e acuerdo di huur ora cu e huurder no ta di acuerdo cu esaki, mester permiso di Huurcommissie pa esaki. E huurder por entrega un peticion pa termina e acuerdo di huur, esaki por tuma luga na Dienst Huur- en Consumentenzaken mes of tambe via e-mail y via telefon, nan por yuda yena e peticion aki. Si tur informacion y documentonan necesario ta completo ta haya fecha pa e sesion y Huurcommissie ta dicidi ariba e caso individual, si ta duna permiso of no pa termina e acuerdo di huur y duna un fecha pa cual mester sali. Si un di partidonan no ta di acuerdo cu e decision di Huurcommissie por acudi na Corte di Husticia pa apela e decision. Solamente hues por duna sentencia cu un ontruimingsbevel pa por laga saca e huurdo (nan) cu ayudo di deurwaarder y polis (sterke arm).
