Un grupo di ciudadano cu di manera ‘grassroots’ a cuminsa un movimento contra pedofiel a reuni ayera pa plania un protesta dilanti parlamento 3 di juli venidero pa 3 or. E grupo no ta haya cu castigo redobla, cual prome minister a indica cu lo bay trata den parlamento proximo siman, ta suficiente. Asina varios persona den e reunion di mas o menos 60 persona a indica cu e problema ta mas sistematico, y redobla e castigo no lo resolve henter e problema.
E grupo di ciudadano aki te awo no a organisa formalmente, pero ta di compronde cu e intencion no ta pa esaki bira algo demasiado formal, mirando cu ta enfocando riba accion di ciudadanonan y ta enfatisa durante e sesion ayera cu no ta cu un meta politico e grupo ta reuni ni pa otro meta, si no cu kier yega na preveni cu hendenan ta abusa di menor sexualmente.
Entre e puntonan cu por a tende cu a bin dilanti den e reunion ayera, ta cu kier exigi un registro di pedofilo na Aruba, mas fondo pa Voogdijraad, y hopi punto mas. E grupo lo purba reuni mas hopi punto cu ta posibel pa asina entrega esaki na parlamento dia 3 di juli. Sinembargo mirando cu riba e asunto aki tin falta di oido di parti di e clase politico, nan a enfatisa cu si no duna nan oido, lo intensifica accionnan.
‘Si bo no ta parti di solucion, bo ta parti di e problema’
Durante e reunion tambe a discuti e probabilidad cu mayoria persona cu a presenta ayera cu invita famia y conocir, lo bay duna un tipo di excusa pa no mester bay. Sinembargo tabatin par di persona cu a trece dilanti cu si no cuminsa activamente pa contribui na solucionnan pa e problema sistematico y extenso aki na Aruba, ta contribui na sigui laga pedofiel abusa di mucha.
‘Polis no ta capacita pa trata victimanan trauma corectamente’
Entre e cantidad grandi di problema cu tin den e cadena di husticia ora ta trata di condena pedofiel y e proceso complica pa yega na conviccion, un di nan ta cu bay entrega denuncia contra un pedofiel na polis ta un experiencia intimidante y traumante, cual ta haci cu tanto mucha como adulto ta dicidi di no haci esaki.
Durante e evento nos a combersa cu Dorene Joseph, kende december ultimo a denuncia publicamente Igmar Ogenia, kende tabata conocir cercano di su famia pa hopi tempo. Joseph a conta con bou auspicio di un curso di massage profesional, Ogenia a abusa sexualmente di dje.
Pero pa dos aña Joseph no por a ni pensa di menciona e echo aki na otro persona, menos yega na e corahe pa bay warda di polis y entrega denuncia oficial contra Ogenia. Joseph a conta nos con ora porfin a haya suficiente corahe pa bay duna aangifte, e agente policial cu a tuma e declaracion a scrutina tur aspecto di su declaracion, pero sin tene cuenta con traumatico e ta pa un victima di abuso sexual pa bay bek mentalmente na e momento cu e abuso a tuma luga. Joseph a bisa cu entre e problemanan mas grandi ta cu e agentenan cu tuma e declaracionnan aki no ta capacita pa haci e trabou considerando e trauma.
Nota di redaccion: Riba e asunto di tumamento di declaracion pa denuncia, no solamente mester cuestiona si polis ta riba nivel pa tuma declaracion teniendo cuenta cu trauma di un victima, pero tambe ora ta trata di mantene secrecia. Asina por a mira ultimo tempo cu Atan Lee a bay entrega denuncia contra un atentado na su bida, y luego e mesun recherche a conta e persona cu a menasa Lee cu el a entrega e denuncia contra dje y a hasta dun’e su number di telefon.
