Como un dia “historico” pa Fundacion Rancho y pa e bario di Rancho mes, presidente di e fundacion menciona Clifford Rosa a cualifica e acto oficial di apertura di nan centro di actividad situa na Koningstraat 38.
Pa duna contenido na e acto aki a keda inaugura varios expo organisa pa Fundacion Rancho como esun di boto chikito crioyo, potretnan y a wordo presenta dos documental. Practicamente nan a bin cu tur e materialnan cu nan tabatin den nan oficina chikito patras di Museo Arkeologico Aruba.
Sr. Rosa ta bisa cu nan ta bin trahando basta aña caba riba e proyecto aki, ya cu e lema di e fundacion ta conservacion di historia y cultura di e bario di Rancho. “Esaki ta un soño cu tabata den nos statutonan desde 2010 caba ora cu nos a inicia. Semper a haya cu ta necesario pa e bario di Rancho tin un centro caminda hoben y adultonan por yega na otro y intercambia.”
Centro di actividad
E centro di actividad ta un cas di antes cu ta propiedad di un famia hopi conoci den e bario aki. Nan a adkiri e cas aki riba huur, pero e deseo ta pa pronto recauda suficiente fondo pa adkiri esaki, y pa e por bira e prome “asset” di e fundacion. Nan ta bay cuminsa di biaha un campaña pa recauda fondo pa logra cumpra e cas aki.
Rancho lo sigui mantene su oficina na John G.Emanstraat, mientras cu e cas na Koningstraat 38 ta bira un expansion di e fundacion pa realisa actividadnan den e bario di Rancho. Sr. Rosa ta bisa cu pa nan Koningstraat ainda ta parti di Rancho; mientras cu Boliviastraat ya ta yegando cu e bario di Socotoro. Sinembargo e “extension di Rancho no a wordo defini, y nos no ta bay defini tampoco.”
Segun Sr. Rosa e echo aki ta duna e fundacion forsa pa sigui move pa un miho futuro di Rancho. Nan ta bay organisa actividadnan manera workshop, lectura y exposicion pa mantene bibo e tradicion di e habitantenan di Rancho, entre nan trahamento di boto miniatura, boto di piscado, historia di tambu, etc. Pero nan ta wardando riba fondo, ya cu mayoria di nan proyectonan si no tin fondo dificilmente nan no por logra nada.
“For di e luga aki nos ta bay saca mucho mas proyectonan cu nos tin warda.” Tambe nan kier bin mas structura riba trabou academico relaciona cu historia y informacion di Rancho cu sosten di diferente instancia como departamento di Cultura, UNESCO Aruba y Universidad di Aruba.
E ta laga sa cu tin espacio pa partnernan den sector priva colabora den e proyecto aki mirando cu ta cerando un acuerdo cu departamento di cultura aworaki. Pues si wak e, semper tabata boga pa tin e sistema di 3 pilar cual ta: pilar publico (gobierno), fundacion y tambe sector priva, e tres pilar nan ey mester por traha hunto pa por mira un desaroyo den tur aspecto, sr. Rosa ta termina bisando.
Ginelly Quandt kende ta un trahado boluntario di fundacion Rancho a bisa cu e centro di actividad aki y como su nomber ta indica ta “actividadnan cu lo bin den bario pa muchanan y hendenan grandi den bario”. Nan ta proyectonan cu nan lo bin cu nan pa 2017.
