Durante fin di siman ultimo a keda conoci cu polis a mester bay pa cierto night club of barnan cu cumplimento di orario di ciere no a wordo acata. Ademas tambe mester a atende algun grupo cu aglomeracion di hende na otro luganan, cu ciudadanonan mes a considera como ‘luga di fiesta den e normal nobo’.
Manera Gobierno di Aruba a duna di conoce den ultimo simannan, fasenan di reapertura di economia a cuminsa paso pa paso, loke a causa cu barnan y night club a cuminsa ricibi nan clientenan pa ‘dal un par di drinks’ y sali di cuarentena.
Diasabra ultimo no tabata diferente, specialmente pa algun luganan aki cu a keda habri despues di e ora estableci pa su ciere. Un di nan tabata un cu ta keda ubica na General Aviation Terminal y cu unidad motorisa di polis a bay cera e luga y duna un boet pa e persona encarga di e establecimento. Segun algun website local a keda conoci cu e luga aki a wordo cera despues di 11or di anochi y ta un luga priva, na unda e hendenan por drenta cu carchi di miembresia.
Asina mes a por a mira den otro luganan na aire liber, por ehemplo, ex Bushiri Hotel na unda personanan ta reuni pa celebra y comparti cu amigonan sin tuma medidanan di precaucion pa distanciamento social.
Prome minister Evelyn Wever-Croes a menciona dianan pasa durante un conferencia di prensa cu aunke Aruba ta liber di Covid-19, tur persona mester mantene medidanan di precaucion manera distanciamento social, tene cuenta cu tur instruccion cu a duna, pa motibo cu segun e mes a sigura, no por duna garantia cu e virus no ta aki mas. P’esey ta keda den cada ciudadano pa tene distancia cu otro y no haya cu e mala suerte cu un persona por traspasa e virus.
