Te ainda no tin un cifra specifico riba e cantidad di hende desemplea actualmente na Aruba. Tabatin un discrepancia recientemente riba e cifranan di desempleo entre Departamento di Labor (DAO) y Oficina Central di Estadistica (CBS) riba e concepto mes di desempleo y kendenan lo por cay bao e concepto aki.
Mirando e facilidad di ayudo di subsidio di salario y FASE cu gobierno ta otorgando na companianan, ciudadanonan cu a perde trabou y empresarionan independiente ta wordo papia di un cifra tentativo di un 77%.
Minister Glenbert Croes den presencia di director di DAO, Franklin Kock a bisa cu nan ta usa un cifra estimado relaciona cu tur e gruponan di trahadonan den riesgo di perde trabao. Actualmente tin hopi hende ta hayando subsidio di salario, cu muy probablemente despues di e crisis aki no ta bay keda cu trabao. Un factor tin di haci cu economia no ta bay reactiva inmediatamente na shen porciento. Tin hopi hende cu ta haya FASE cu no ta bay keda cu un trabao, pasobra tin hopi compania cu no lo sobrevivi e debacle di e crisis di Covid.
Segun e mandatario, e estimado cu nan traha cune como departamento di Labor di e ciudadanonan cu ta den riesgo di perde nan trabao ta un 77%. El a bisa cu e cifra aki ta a base di metodologia cu nan ta traha internamente semper. Pues el a bisa cu den e caso aki DAO no ta inventando metodologia pa sostene e cifra porcentual aki. Nan mester di e cifra si pa asina gobierno por haya un bista ‘casi real’ el a bisa. Tambe el a aclaria cu e cifra aki ta cambia constantemente.
E cifra di DAO versus e cifra di CBS tin un diferencia porcentual. CBS a usa un cifra di 73.1%. Pero e ta haya cu cualkier di e dos cifranan cu bo usa ta mustra e gravedad di e problema grandi cu nos tin pa dilanti. Pa e motibo aki –segun e mandatario– nan a lanta e plataforma nacional di trabao pa atende cu e retonan cu ta bay tin pa logra reactiva e mercado laboral. E ta e manera pa e personanan por logra un re empleo di tur esnan cu ta den peliger di perde nan trabao.
E ta spera cu tur e ayudo y asistencia social cu gobierno ta dunando por keda activo pa un periodo prudente pa keda cu cabes riba awa, mientras cu nan ta reactivando nos economia. “Nos ta luchando pa nos sobrevivencia manteniendo nos dignidad humano,” el a declara.
Practicamente –segun e mandatario– nos ta den un incertidumbre, ya cu awe nan por bisa un cos, pero mañan bo no sa kico lo bay pasa. Gobierno su entrada ta cayendo mas cu un 50% caba. Pues e ta haya cu no ta facil pa goberna cu cierto siguransa meymey di e pandemia cu henter humanidad ta aden. Te hasta ta wordo papia di otro brote di e virus, y te hasta cu e virus aki ta cambia of e ta sufri mutacion.
