Directiva di SVOA (SMOA) a dirigi un carta, fecha 17 di juni 2020, na ministro encarga cu enseñansa, dr. Rudy Lampe den cual ta informa e mandatario di diferente aspecto di e situacion actual na Colegio Arubano.

Banda di atencion pa e asuntonan cu a haya bastante publicidad ultimo simannan, manera e relacion cu e docentenan y e retiro di e rector, e directiva tambe a mustra riba problemanan cu nan ta mira cu ta requeri mas subsidio di banda di gobierno. Un punto ta trata e problemanan social bao di e alumnonan. Segun e directiva, e scol tin solamente dos trahador social pa 1.600 alumno. Esaki ta segun nan insuficiente y ta desea di aumenta esaki te na cuatro. Directiva ta mustra riba urgencia di esaki y ta ilustra esaki bisando cu “e enorme problemanan social manera e menasa di un ‘school shooting’ y Covid-19 y tur e medidanan relaciona cu esaki.” E directiva ta desea di tin un persona di confianza pa dedica su mes na interes di e alumnonan. Sin embargo, pa tur esaki lo mester subsidio, e directiva ta observa.

Ta duna un splicacion breve tambe di e funcion di e fundacion nobo cu a lanta fin di 2019 (Stichting Pro SVOA) den cual a hinca e ‘Boekenfonds’ di e scol. Esaki segun e directiva pa por cumpra buki mas barata. “E meta di e fundacion aki ta pa recauda fondo pa SVOA en general y e boekenfonds en particular.”

Tambe directiva di SMOA ta preocupa cu e cantidad di trabao cu e directiva mester haci sin haya algun compensacion financiero. “Ta desea di indica cu, mirando cu e Directiva ta carga responsabilidad pa un scol cu 1600 alumno y alrededor di 130 empleado (igual na un hotel grandi) ta realmente no hustifica cu e miembronan di Directiva ta carga e responsabilidad aki sin compensacion.” Por lo tanto e directiva ta desea pa adapta e Landsverordening Voortgezet Onderwijs (LVO) pa e directiva por cambia e modelo di dirigencia di e fundacion den un asina yama ‘two-tier model’ , un structura unda e dirigencia conoce dos capa; den esaki e ora e actual miembronan di directiva ta haya un tarea di supervision y e responsabilidad pa e operacion diario ta bira – tambe huridicamente – tarea di dirigencia di e scol. E directiva ta expresa e temor cu den futuro lo ta dificil pa haya hende pa mensualmente ta disponible por lo menos 15 pa 30 ora, sin ningun compensacion. “E idea ta pa percura cu e centro di gravedad di e administracion diario y a largo plazo ta bin den man di e rectorado, cu ta un funcion paga, pasobra no ta razonable cu e funcion aki ta ser eherce pa voluntario sin remuneracion, cu banda di esaki tambe mester traha pa nan modo di biba.”

En vista cu ta recientemente a manda e carta no tabatin, asina leu cu nos informacion ta yega, un reaccion di e ministro concerni riba e preguntanan entama den e carta.