Den ultimo simannan, a surgi diferente protesta pa motibo di mal contento di sector publico. Di esaki tres sindicato a logra uni forsa y a sali pa busca derecho pa nan miembronan den e crisis aki di Covid-19.

Bon Dia Aruba a compronde di e tres sindicato aki cu a vocifera nan preocupacionnan dos cos specifico: nan a cita varios biaha publicamente cu ambtenaar ta solidario cu e crisis aki, nan ta dispuesto pa entrega; pero e manera con gobierno kier impone no ta e miho manera pa hacie.

Otro topico cu recien a sali na cla, ta cu gobierno ta pasando un ley cu lo afecta e trahadonan publico y articulo 7 specifico por bira un problema den futuro pa tur ambtenaar.

Josephine Albertus di Simar a trece dilanti su preocupacion pa e articulo 7, pa motibo cu den esaki ta bisa cu unabes cu e ley aki pasa, tur ambtenaar su salario por baha den porcentahe. Y maske Parlamento por trece dilanti nan deseo pa cambionan, nan no por vota riba dje y gobierno no ta obliga di cumpli cu e deseo di Parlamento.

Segun Gobierno di Aruba a publica den un nota recien: “Sindicatonan como SPA y SIMAR ainda kier protesta, no pa ‘cuanto’ ta wordo corta di salario, pero pa ‘con’ e 5% ta wordo corta ,pasobra e ta afecta nan pensioen. Gobierno a splica cu e cortamento di 5% riba salario di empleadonan publico tin un efecto di 4 florin riba nan pensioen den futuro y pa maestronan e ta 4.50 pa luna riba nan pensioen.”

Bon Dia Aruba a acerca un hurista experto riba tereno laboral pa haci dos pregunta specifico cu ta riba e topico aki, articulo 7 di 938 LV tijdelijke versobering bezoldigingen en voorzieningen overheid y cortamento di salario di sector publico.

Tocante e cortamento di 5% di salario di empleado publico manera cu gobierno kier implement’e kitando 5% directamente for di bezoldiging, a usa un palabra specifico cu ta ‘tot nader order’ cu ta nifica cu huridicamente no tin un fecha concreto di ki dia lo duna e ambtenaar e 5% bek. E palabra aki por nifica cu por ta mañan of aki 30 aña, e palabranan ‘tot nader order’ no ta duna un fecha concreto, sino ta laga hopi luga habri pa haci mal uso di dje den aspecto huridico. Mirando e direccion di e ley OLV 938 LV tijdelijke versobering bezoldigingen en voorzieningen overheid cu mester wordo cambia, e articulo 7 ta duna indicacion cu e cortamento no lo bay keda na solamente na 5%; e articulo 7 aki lo habri porta pa mas cortamento den futuro sin cu Parlamento por haci amienda.

E diferencia entre sector priva cu sector publico ta cu despues di e crisis di Covid-19 pasa, sector priva ta bay haya 100% di nan salario bek, pa motibo cu ainda tin un contract laboral valido. Mientras cu ambtenaar no tin algo concreto di kico ta bay pasa y cuanto mas nan lo corta.

Articulo 7 938 LV tijdelijke versobering bezoldigingen en voorzieningen overheid si Parlamento aproba e ley aki ta duna Gobierno di Aruba e poder di baha tur ambtenaar nan salario via un landsbesluit houdende algemene maatregelen (LB.h.a.m) sin cu Parlamento por haci cambio riba dje of stop e ehecucion di esaki, sin dialoga cu sindicatonan y sin cu mester pasa pa Raad van Advies. Unilateralmente gobierno por baha salario di tur ambtenaar sin consulta cu ningun hende, esey lo pone e ambtenaar den un posicion hopi zwak.

Unico cos cu gobierno tin cu haci ta informa Parlamento y Parlamento por manda un bezwaar pero esaki no tin peso huridico pa motibo cu parlamentarionan no por vota riba LB. h.a.m y si Parlamento no ta di acuerdo mes cu reduccion di salario nan no tin manera legal pa por stop e decision aki.