Unabes cu presidente di Sindicato di Polis Aruba (SPA), Jose Dirksz a lesa e carta of manifiesto entrega na Parlamento, caminda nan ta duna un ultimatum pa nan haya un contesta awe mes no mas tarda cu 12or di merdia, a surgi un diferencia di opinion entre e sindicalista y presidente di e organo legislativo, Juan Thijsen.

Sr. Thijsen a splica SPA cu parlamento tin otro forma di traha cu gobierno, ya cu como presidente di Parlamento e sa cu tin un reunion cu SPA den e comision permanente di asuntonan hudicial pa 10or di mainta diabierna awor. E ta haya cu den e reunion aki lo ta bon pa SPA bin atende cu e parlamentarionan nan preocupacionnan.

Presidente di SPA a laga sa cu nan mes no tabata na haltura di e reunion aki. Tambe el a expresa cu semper cu nan ta entrega un carta pa gobierno nan ta bin cu un deadline pa no laga e cosnan den incertidumbre. Sinembargo Dirksz a bisa cu por tin excepcion. Pero si el a pidi den nomber di polis un contesta riba e carta aki. “E no mester ta un contesta definitivo,” el a bisa.

Thijsen a bisa cu como presidente di e instituto aki, e por traha e carta pa cumpli cu e ultimatum, caminda nan ta wordo informa gewoon tocante e reunion di e comision permanente. Igualmente den e carta lo wordo insisti pa SPA participa den dicha reunion caminda nan por trece nan puntonan dilanti.

El a bisa cu como presidente di Parlamento, e ta papia pa e instituto aki. El a aclaria cu pa loke ta tratamento di ley, nan tin cu asumi nan responsabilidad. Kiermen ora cu gobierno ta traha un concepto di ley cu ta drenta Parlamento, nan obligacion ta pa trat’e. “Si nos no ta hay’e bon, nos ta bisa nan tambe cu nos ta desaprob’e,” el a declara.

Thijsen a destaca importancia di trabao di polis den comunidad, principalmente pa siguridad di nos pais. “Mi ta kere cu tur hende, y boso nan tambe tin e derecho di trece boso punto dilanti,” el a bisa. Den nomber di e instituto aki, Sr. Thijsen a ricibi e carta, y el a declara cu parlamento ta bay trat’e, ya cu e concepto di ley di gobierno riba entre otro 5% di cortamento di nan salario mester bin parlamento.

Presidente di parlamento a bisa cu como parlamento, nan no ta deal cu e ordenansa nacional (landsverordening) y LBHam.

Igualmente el a laga sa cu si tin algo cu no ta bon, segun constitucion, principio di bon gobernacion, y e leynan, nan tin cu trat’e. El a agrega cu cada parlamentario incluso su persona, tin e obligacion tambe pa trata e peticion cu SPA a entrega. Tambe evalua kico nan lo bay haci ya sea aproba of desaproba e concepto di ley aki. “Asina ta den e democracia cu nos ta!,” el a declara.