Departamento di Impuesto Aruba (DIMP) ta evaluando diferente opcion pa entrega plachi di number. E weekend ultimo nan a introduci un sistema temporal di drive-thru. Pero nan ta mira cu tur aña otorgamento di plachi ta bira un desafio pa nan.
Directora di DIMP, Luenne Gomez-Pieters a bisa cu logisticamente nan no por otorga 88 mil plachi den un luna. Un opcion ta pa bin cu un plachi fiho pa 5 aña. Te hasta nan ta considerando un solucion tecnologico cu un mashin self-service. E ta un tipo di robot cu ta realisa tur e proceso cuminsando cu e comprobante di pago, y na final e ta saca bo plachi manera un ATM mashin.
Tambe den futuro nan tin un proyecto caminda polis por controla digitalmente pa medio di scan e number di auto na distancia. Asina polis den su device ta haya sa, si e seguro y impuesto di vehiculo ta paga of no.
Nan ta proyectonan ambicioso, pero nan ta demanda un inversion grandi y actualmente gobierno no tin espacio financiero pa realisa un inversion di e caliber aki.
