Directora di departamento di Impuesto (DIMP), Luenne Gomez-Pieters, a expresa su satisfaccion riba con e cumplimento ta bayendo pa loke ta e pago di impuesto di vehiculo di motor. Un 83% di tur nan contribuyentenan a cumpli cu e impuesto aki.

E ta haya cu e cumplimento aki ta algo di aplaudi. Te cu awor a haya entrada 20.8 miyon florin den caha di gobierno pa concepto di e impuesto aki. Nan tin un total di 89.023 plachi registra den nan sistema. Ainda un 13.5% di e contribuyentenan no a cumpli absolutamente cu e compromiso aki. E cifra porcentual aki ta representa un cantidad di 12.059 plachi no ta paga.

Cobransa

Como un departamento encarga cu cobransa pa asina gobierno por haya su entrada pa atende cu su gastonan, Gomez-Pieters a bisa cu actualmente nos ta den un situacion di crisis, y nan ta teniendo cuenta cu e situacion financiero di e ciudadanonan. Nan a yega di bin cu un alivio fiscal pa esnan cu tin cobransa existente. Den e plan aki nan a duna flexibilidad di areglo di pago mas extenso pa paga e impuesto aki. Pero si un hende ta ripara cu e no por paga e suma di 320 florin den un of dos pago, e por aplica ainda e luna aki pa un areglo. Si bo no por cumpli cu e compromiso aki ta consehabel pa entrega bo plachi.

Den caso di taxista y busnan y e tipo di plachi T y O cu ta companianan cu ta opera den sector turistico, si nan ta sigui ripara cu den e luna cu ta bin no tin mucho actividad, nan lo por entrega nan plachi pa evita cu nan por haya un cobransa adicional y/of un boet.

Tambe pago di seguro ta hunga un rol specialmente pa e tipo di vehiculo cu ta cay den e categorianan T y O, ta resulta costoso. E ta poni den ley cu e departamento aki tin responsabilidad pa controla si e vehiculo tin seguro. Pero nan por a ripara cu den e fase cu e taxistanan mester busca nan plachi tabatin un bon actividad.

Tambe nan a introduci un areglo di pago flexibel teniendo cuenta cu e situacion actual. Pero aworaki cu poco poco cu pais Aruba a cuminsa reactiva su economia, DIMP mester bay bek den nan structura di semper. Den e caso aki e fecha ultimo cu ta conta pa e di dos mita di aña ta 30 di juni awor. Pero nan a dicidi di aplas’e cu un luna mas pa duna espacio na esun cu ainda no por a cumpli cu e impuesto di vehiculo di motor. Pero despues di 31 di juli awor, polis ta cuminsa controla. Tur auto mester tin nan plachi y tur impuesto mester ta paga.