A pesar di e situacion di e crisis di Covid, Stichting Rancho no a para keto. Presidente di e fundacion aki, Clifford Rosa a bisa cu nan a evalua kico nan lo por sigui haci durante loke ta resta di 2020.
E biaha aki el a expresa su satisfaccion y gradicimento cu hunto cu Museo Arkeologico di Aruba, nan ta intercambiando idea pa evalua kico nan por haci den aliansa na beneficio di educacion. Specialmente pa crea material di educacion pa nos comunidad.
Un aspecto tin di haci cu e area di herencia cultural y historico di Aruba, Rancho y Oranjestad pa asina nan por tin acceso na mas informacion. “Nos ta kere cu awe Museo Arkeologico a duna nos e oportunidad di re-start un biaha mas,” el a bisa.
Pa tal motibo nan ta pidi un biaha mas pa comunidad y tur partnernan brinda nan colaboracion pa Stichting Rancho por reactiva bek. Nan ta accentua riba e proyecto di hofi di Rancho cu nan ta ehecutando pa medio di nan centro di actividad.
Nan a cuminsa cu e prome fase y den dje nan kier transforma nan centro di actividad totalmente den un hofi. Nan ta pidi boluntarionan pa registra y forma parti di e proyecto aki. Mirando cu nan tin poco fondo y den principio nan mester di mas man pa e proyecto aki por bira realidad. Tambe Stichting Rancho ta consciente di nan realidad financiero. P’esey nan ta bay accentua hopi riba e parti di donacion of colaboracion.
Rosa a bisa cu desde 13 di maart ultimo, ora cu e dos prome caso di Covid a keda detecta na Aruba, el a bira un ‘dolor di cabes’, mirando cu nan programa di actividad a resulta afecta. Entre nan esun di 18 di maart, cu tabata un careta di boto miniatura.
Pero te hasta unda nan tabata por, durante luna di maart y april, e fundacion a sigui labora, ya cu na april nan a cumpli 10 aña di existencia. Haciendo uzo di facilidad digital nan a presenta un documentario relaciona cu nos herencia cultural inmaterial di trahamento di boto miniatura.
