Un bunita y positivo noticia pa Aruba. Fonds Voor Cultuur a anuncia e ganado anual di nan premio Gouden C 2019. E biaha aki e participantenan a presenta un proyecto cu mester a experimenta riba e tema di inclusion.
Ta asina cu e premio aki a wordo presenta y anuncia pa minister Hulandes di Educacion, Cultura y Ciencia Hulandes, Ingrid van Engelshoven, diasabra ultimo. E programa aki di participacion cultural a otorga nan di nuebe Gouden C pa e proyecto ‘Re-fill your cup with authenticity’, presenta pa Sharina Gumbs di Aruba. E mandatario a anuncia e ganado durante e talkshow online ‘Cultuur voor iedereen’.
E proyecto ganado ta siña e profesional di salud pa haci uzo di arte abstracto pa stimula e creatividad y minimalisa stress. Segun e hurado, e proyecto ganado y presenta pa Gumbs ta uno ‘senciyo cu un impacto grandi, y cu posibilidad di extende su mes…’
E ganado ta wordo eligi pa medio di votacion. Nan a bin cu e tipo di concurso di participacion aki pa sigui stimula e profesionalnan riba tereno di salud y maestronan pa desaroya nan propio creatividad, y tambe di nan coleganan.
