Ayera a tuma luga e di dos dia di drive-thru pa otorgamento di plachi number di impuesto di vehiculo di motor riba e parkinglot di departamento di Impuesto (DIMP). Directora di e departamento aki, Luenne Gomez-Pieters, a considera cu e servicio innovativo aki a bay ‘hopi bon’.
Diasabra nan a cuminsa entrega masivamente e plachinan den cuadro di implementacion di e tres fase di entrega di e plachinan pa publico en general. Inicialmente e fin di siman aki tabata di A-1 te cu A-4000, pero nan a dicidi di haci’e te A-6000, mirando cu e proceso a duna espacio pa otorga mas plachinan y cu nan por mas, segun directora di DIMP.
Nan a dicidi di saca mas plachi di un manera structura. Nan a otorga 820 plachi diasabra. Gomez-Pieters a indica cu e cantidad aki ta denter di e promedio. Nan a calcula di entrega alrededor di mil pa dos mil plachi pa dia. Pero mester compronde cu tin clientenan cu a haya nan plachi caba, ya sea via di un servicio di entrega (delivery).
Logistica
DIMP a bin cu full un logistica cu ayudo di personal di polis y DOW. Ta asina cu den un punto nan ta controla e seguro y impuesto paga. Despues di control, e auto por a pasa den nan parkinglot di drive-thru, y nan ta recoge e plachi. Pa garantisa cu e proceso aki por cana lihe tabatin 32 empleado riba pia cu a haci nan best pa duna un servicio eleva pa e contribuyente.
E experiencia di e prome dia tabata importante pa evalua e sistema di drive-thru, y nan por a mira cu a bay bon. El a bisa cu e cliente tabata tarda un promedio di mey minuut na momento di recoge e plachi. Igualmente e ta considera cu e organisacion tambe a bay bon. Esaki a pesar cu e tabata algo nobo pa nan. E no ta considera esaki un ‘experimento, pero si un manera nobo pa otorga e plachinan’.
A pesar cu tabatin algun keho cu a drenta na Bon Dia Aruba con e proceso aki tabata congestiona diasabra, Gomez-Pieters a bisa cu e tabata un bon experiencia, y nan a percura mantene e movecion constante pa e por cana di un manera structural.
Director di departamento di Impuesto a duna un bon balans, ya cu e acogida a bay bon. Nan clientenan a bin tempran y nan tabata contento. “Nan ta satisfecho y esey pa nos ta un indicacion cu nos a logra nos meta,” el a bisa.
Gomez-Pieters a declara tambe na Bon Dia Aruba cu nan clientenan a duna un bon colaboracion. Pero tambe el a expresa palabra positivo pa e bon cooperacion cu cuerpo di polis a brinda na nan; y tambe cu personal di DOW cu a yuda pa instala e baricada debidamente. Tambe tabatin presencia di Cuerpo Especial Aruba cu a yuda nan tira un bista pa tur cos por a bay den ordo. Tabatin funcionario cu a yuda guia e trafico pa dirigi nan mes riba e linea cu nan mester core den e parkinglot di DIMP.
