Directivanan di scol tanto Catolico (RKCS) como Protestant (VPCO) ta rabia cu gobierno, pa motibo cu simplemente gobierno no kier acepta cu e loke kier bini cune na medida pa baha gasto lo nifica un catastrofe pa nos enseñansa. Calidad di enseñansa lo bay atras sin mas, lo no tin fondonan pa cubri gastonan di tur dia na scol, mientras cu den e scenario mas pio lo tin di kita como 18% di e personal. Asina serio cos lo bira si gobierno bay na corda den enseñansa actualmente.

Segun directivanan, recientemente un documento a leak, pero ta danki Dios cu esaki a leak pa a sa ta kico gobierno tin den tapa, pasobra esaki lo por a bira e documento final cu ta masacra enseñansa. Es mas, no tin un analisis di e impacto como consecuencia di e reduccion di gasto quo kier bay implementa. Cualke organisacion, y sigur den e caso aki cu ta gobierno, ora cu ta bay tuma un decision dje magnitud aki ta importante pa sa kico ta e impacto cu e ta pay causa.

Pero directivanan di scol a haci nan huiswerk y a analisa algun dje cifranan menciona den e memo, y nan por bisa cu esaki tabata espantoso. Djis pa duna un ehempel di cada 100 florin cu directivanan di scol ta haya di gobierno, 90 florin ta bay pa cubri salario di maestronan, y e sobra ta pa cubri gastonan di limpiesa, Aqualectra, material di enseñansa, ICT y otro gastonan. Pero pa hopi aña a splica cu e subsidio no ta yega pa cubri e demas gastonan despues di kita pa salarionan. Pero for di e loke ta sobra pa cubri demas gastonan no por bay corta mas tanto ainda, pasobra no por keda sin conde luz na scol, no por keda sin cumpra papel di wc, no por keda sin limpia.

Pues e unico manera cu directivanan di scol lo por bay corta pa baha su gastonan, ta riba e lista di personal. Den e caso ey lo tin di kita como 18% dje personal pa por keda cu cabes riba awa. E problema ta cu, no a haci un analisis di e impacto.

No mester lubida cu tur hende riba e isla aki for di nan 4 aña tin di pasa dor di e instituto ey, y ta netamente aki gobièrnu kier bay corta. No lubida cu tur locual inverti den enseñansa awe lo salba e cadena di husticia pa mañan.

Gobièrnu ta pay Hulanda hopi biaha y papia di bahamento di gasto riba tur cos, pero mester bini cu un plan y mustra cu realmente ta para tras di enseñansa. Lo por baha gasto den otro sectornan, pero laga nos inverti den enseñansa pa nos por ta otro como pais den futuro.