Nos redaccion a haya un comentario di nos Promer Ministro riba nos Editorial di ayera. Nos kier a gradici nos Promer Ministro pa su reaccion, cu nos kier comparti tambe cu nos lectornan, pero no den forma textual, sino tematico. Nos kier tambe pidi disculpa na su persona por si acaso a saca un conclusion robez, cu e costo di e “aanspraak op pensioen” di nos Promer Ministro, y e demas miembronan di su gabinete, lo ta forma parti di e Wever-Croes norm, cu ta locual nos a asumi y e ta bisa cu categoricamente no ta asina. E ta bisa si cu otro beneficionan ta forma parti di e pakete cu ta suheto na reduccion den cuadro di cumplimento di e Wever-Croes norm.
Sin embargo, nos ta kere cu un beneficio asina lucrativo manera e areglo existente di pension pa politico y mandatario ta un beneficio extra di gran peso, tambe pa nos pais carga, y no por compara cu e areglonan cu segun ley ta conta pa otro ciudadano, tanto pa ambtenaar como pa empleado den sector priva. Por lo tanto nos ta mantene e posicion cu mester tuma e areglo di pension pa mandatario y parlamentario na cuenta como un beneficio cu lo mester ta suheto na consideracion pa reduci.
Locual si nos no ta di acuerdo cu Ministro Presidente ta su comentario cu BDA lo ta perdiendo obhetividad. Comentario di Promer Ministro tabata cu e articulo tabata basa solamente riba e pregunta haci na su persona durante un rueda di prensa. Esey no ta asina, pasobra dia 8 di juni nos a publica un articulo extenso basa riba investigacion cu nos redaccion a haci encuanto e tema, cuanto e contribucion di un ministro ta actualmente pa e pension cu e lo haya despues di yega edad di pension. Cu tur obhetividad cu e caso merece nos a duna un analisis di e beneficionan acumula cu un mandatario ta goza, y cu ta haci cu, en corto bisa, e contribucion di un mandatario no ta yega ni pa cubri e promer aña di pension. E articulo aki tabatin un atencion hopi grandi di nos lectornan riba Facebook y nos website. Tur e calculacionnan corespondiente tabata presente y no tabata algo dirigi riba persona di e ministro.
Berdad ta cu nos ta siguiendo e discusion di e Wever-Croes norm desde e promer momento, tambe a base di loke nos ta tende den e contestanan cu e Promer Ministro tabata contesta riba pregunta di otro medio den e multiple ruedanan di prensa cu tabatin ultimamente. Den un anterior Editorial nos a comenta cu si e Wever-Croes norm tin e mesun base cu e asina yama Balkenende norm, e salarionan di e directornan di empresanan estatal lo no conoce mucho cambio a consecuencia di Wever-Croes norm, pasobra e “pensioenlasten” di e “pensioenaanspraak” di Promer Ministro ta hopi halto. Nos a bisa tambe e tempo ey cu nos lo por laga haci un calculacion door di un actuaris, cual calculacion nos a laga haci tambe recientemente. Nos a puntra Ministro Presidente tambe e tempo ey, si e Wever-Croes norm ta bay tin e mesun base cu e Balkenende norm y cu si e pensioen di ministro lo ta inclui den e base. Prome Minister e tempo ey a contesta, cu aki na Aruba nos tin Wever-Croes norm y cu esaki ta basa riba salario.
Nos ta kere cu transparencia di parti di gobierno lo contribui enormemente pa prensa si nos no mester asumi cosnan robez. Lamentablemente hopi conseho na gobierno no ta keda publica. E ultimo aki no ta falta di prensa. Di nos banda nos lo por haci un peticion na gobierno a base di Landsverordening Openbaarheid van Bestuur (LOB) pa haya e consehonan cu gobierno a ricibi encuanto e topico di e Wever-Croes norm. Naturalmente gobierno no tin mester di warda riba nos peticion y por comparti esaki mesora cu pueblo.
Nos mester bisa tambe, den tur obhetividad, cu e asunto aki no ta algo di e Promer Ministro solamente. Lo ta bon si nos por haya sa di e demas personanan den e categoria aki, tanto ministro como parlamentario, kico nan ta pensa di e beneficionan cu nan tin cu otro no tin. Por ta cu nan ta bay bisa cu na 2010 nan a entrega hopi caba, tempo cu e actual partido di oposicion a trece norma nobo pa pension, pero cu a keda hopi ‘generoso’ ainda den vista di hopi ciudadano ora nan haya sa e detayenan. Algo cu den tempo di crisis segun nos concepto automaticamente mester bin dilanti. Mescos cu ta discuti ampliamente y di tur angulo e beneficionan cu e empleado publico tin, mester discuti tur beneficio di esnan cu tin puesto politico tambe.
Ta berdad cu e tono di nos ultimo Editorial tabata mas skerpi cu di custumber pero no tabata nos intencion pa dirigi esaki riba su persona, pero si ta expresa cu nos a spera un contesta mas completo, mirando su background profesional como hurista fiscal. E mandatario ta bisa cu e ta haci semper un esfuerzo pa contesta pregunta extensamente y nos no a spera menos den e caso aki tampoco.
