Ora bo ta kere cu cos no por bira pio na e pais bisiña, ta sucede cos cu ta cambia bo opinion. Despues di mester a entrega e base di poder, esta Asamblea Nacional, na oposicion cu un mayoria abrumador, cos a yega asina leu cu e partido Chavista na poder ta mustra su cara berdadero, profundamente anti-democratico. Algun dia pasa, den un accion cu no ta carece di astucia, pero si di sentido comun, presidente Nicolás Maduro a yega na e extremo di pidi (ordena) e muchanan manda den Tribunal Supremo de Justicia pa nan pone Asamblea un banda y otorga nan mes e poder pa aproba e presupuesto 2017. Tur esaki argumentando cu tin un situacion special di crisis economico y di estado di emergencia. E detayenan tecnico legal nos por laga pa e specialistanan den e materia aki. Importante ta con e asunto aki ta bay influencia e sucesonan cerca nos bisiñanan, cu mester ta puntra nan mes ta den ki situacion nan a cay.
Den e mundo complica cu nos ta biba aden, e mundo financiero ta algo asina grandi y poderoso cu ningun pais por ignora. Ni China, Rusia, Iran lo desafia e mecanismonan financiero aki, cu ta haci posibel cu economia internacional ta funciona. Esey ta conta tambe pa un pais manera Venezuela, cu den e temponan bon por a fia cuanto cu e tabata desea, pasobra e tabatin un economia floreciente y prometedor como garantia. Ta pesey tambe cu e Chavistanan a kere cu nan por a basa un “socialismo di e siglo aki” riba un abundancia cu lo a permiti beneficia e masa grandi pober di ciudadano comun. Y tambe resta placa pa e Chavistanan, mescos cu esnan prome cu nan, hinca man den caha di gobierno y saca afo loke nan ta considera nan debido recompensa pa a ‘salba e pais y su hendenan for di gara di imperialismo Noord Americano’. Tur sorto di lema y consigna bunita nos a haya di tende y mira, pero finalmente a resulta cu loke a tuma luga ta e robo di fondo publico mas grandi di historia di e pais y probablemente henter Latino America.
Pero e caida a bin di e banda cu e ladronnan no a spera. Prijs mundial di petroleo a cay dramaticamente, tumbando tur e plan y programanan bunita cu e socialistanan tabatin pa sigui fiesta. Produccion di tur tipo a cay den otro y tur cos tabata depende di prestacion di compania estatal di petroleo PDVSA, cu no por a sigui carga henter e pais, mirando derumbe di su propio produccion tambe. E takeover di e Chavistanan despues di e welga grandi na PDVSA na 2002/2003 a trece e oportunidad di yena e compania cu hende di partido. E efectonan nos por mira awor, no solamente den e discurso ridiculo na Aruba siman pasa na San Nicolas, pero den e operacion pesimo di e compania, cu debe tur su contratistanan y no tin placa pa inverti den renobacion di su instalacionnan. Manera bisa anteriormente, e pregunta ta ken ta cay prome: PDVSA o estado Venezolano.
Naturalmente cu henter mundo ta mira kico ta pasando cerca di nos aki. Y e circulo di amigo riba continente Americano a cuminsa bira chikito; hopi di e amigonan a dicidi di keda keto y mira con cos ta bay. Tambe e gobiernonan amigo na Argentina y Brasil no t’ey mas, y e ‘brothernan’ di Cuba, Bolivia y Nicaragua tin nan mes problemanan pa atende. Un señal fuerte di e isolacion cu Venezuela a cay aden ta e conflicto den Mercosur, unda e otro miembronan a nenga pa Venezuela asumi pa seis luna e presidencia di e organisacion. Na e momento aki Mercosur, sin
Venezuela, ta teniendo consulta cu Union Europeo tocante tratado di comercio liber.
E siman aki tambe, PDVSA ta haciendo un ultimo intento pa evita cu mester paga algun biyon di dollar di bono cu ta madura, y a extende e posibilidad pa inscribi te 17 di october. Esaki a trece un posibel default di e compania mas cerca ainda. Sigur si e intentonan pa mehora prijs di crudo a traves di reduci produccion di parti di OPEC y otronan no resulta. Y e peligro ey ta existi, pasobra pareu cu prijs aumenta, esaki ta trece e productornan ‘caro’ di shale oil na Merca y Canada den wega atrobe. Ademas ta dudoso si Irak y Iran, dos productor fuerte cu net ta bolbe riba pia, ta interesa pa baha produccion.
Y den tur e turbulencia aki, e unico cu ta actua manera nan no sa di mundo, ta gobierno di Aruba. Nan ta firma 2000 pagina di acuerdo cu e pais y regimen muribundo aki, comprometiendo nos cu garantia grandi, probechando di un oposicion cu ta mustra paralisa di miedo pa perde voto si nan vota contra. Nan no a ni protesta via mocion cu no a respeta constitucion den duna oposicion e documentonan concerni. Parce cu cos a cuminsa bon caba cu Citgo derando mas asbest na luga di saca e material di Aruba. Un señal di kico ta warda nos?
