Iniciando e fin di siman aki: Departamento di Impuesto ta introduci drive-thru pa entrega plachi di auto

Pa prome biaha Departamento di Impuesto (DIMP) ta introduci un servicio di drive-thru pa entrega plachi di number pa autonan particular entrante e fin di siman aki.

E anuncio aki a wordo pa e directora di e departamento aki, Luenne Gomez-Pieters y tambe pa e vocero di DIMP, Meverly Romano. Esaki tabata e prome conferencia presencial, despues cu e diferente fase di flexibilidad a drenta na vigor pa reactiva nos economia y nos sistema normal di biba.

Tambe e departamento aki ta cuminsa cu e di tres fase, pero di otorgamento di plachi pa aña 2020 cu a wordo afecta debi na e situacion di e pandemia di Covid-19. E fase aki ta encera esnan cu nan mes kier busca nan plachi directamente na e departamento aki. Diasabra y diadomingo awor nan lo cuminsa for di 9’or di mainta te cu 3’or atardi nonstop. E drive-thru lo ta accesibel solamente via e caminda Avenida Milio Croes direccion Rumbastraat.

Nan meta ta di entrega 4 mil plachi den dos dia. E sistema nobo di drive-thru ta encera cu e automobilista cu su plachi ta cay den e serie entre A-1 te cu A-2000 ta na turno pa diasabra awor. Y diadomingo esunnan cu lo ta na turno ta entre A-2001 te cu A-4000. Nan tabata masha cla pa bisa cu no ta permiti otro serie di number cu no ta cay riba esunnan anuncia ariba. Por ehempel si bo tin un number ariba A-4000, no bin pasobra bo plachi no ta poni cla pa wordo entrega e dianan ey. E proceso aki lo sigui durante varios fin di siman. Entre siman lo tin otorgamento di plachi, pero limita.

Nan ta conseha pa asina cu e auto ta drenta haciendo uzo di e servicio di drive-thru, prepara tur bo documentonan, prome cu bo ta sali di cas. E documentonan cu bo mester tin na man ta e recibo original di DIMP y e seguro valido cu lo wordo controla.

E lo wordo entrega diligentemente na cada auto na turno, caminda e persona no mester baha for di su auto. Tampoco no lo wordo permiti aglomeracion na pia. Lo tin colaboracion di polis y personal di DOW. E dianan ey lo tin instruccion y reglanan pa tur cos por cana den forma organisa. Nan lo anuncia e dianan cu ta bin con ta sigui otorga e plachinan. Tambe bo por check esaki via nan Facebook-page: Departamento di Impuesto.

Pa cumpli cu e medida di preveni di e contagio di e virus, DIMP a bin cu fasenan, dunando espacio pa entrega e diferente tipo di plachi y introduciendo e servicio di deliver. Nan ta hopi contento con e servicio aki a bay, y ainda e servicio aki ta disponibel pa esunnan cu kier haci uzo di dje.